Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 361 Hüküm no: 467 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Hüseyin’in alacak iddiasıyla Hacı Ahmed’e açtığı davada sulh olduğu Ma‘rûz Mahmiye-i İslâmbol’da Firuzağa mahallesi sükkânından Mehmed Çelebi b. Hüseyin nâm kimesne medîne-i Üsküdar’da mahfil-i bâbda meclis-i şer‘-i hatîrde el-Hâc Ahmed b. el-Hâc Salih mahzarında işbu hâzıratü bi’l-meclis Âişe nâm câriyem yediyle târih-i i‘lâmdan otuz gün mukaddem bi-tarîki’l-emâne vaz‘ ve teslîm olunan iki yüz elli guruş hakkım mezbûr el-Hâc Ahmed zimmetinde olmağla meblağ-ı mezbûru taleb ve da‘vâ eylediğimde ol dahi cevâbında inkâr edip beynimize muslihûn tavassutuyla beni da‘vâ-yı mezkûremden on beş guruş üzerine sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr on beş guruşu mezbûr el-Hâc Ahmed yedinden tamamen ahz ü kabz edip ziyâde müdde‘âm olan iki yüz otuz beş guruşa müte‘allika âmme-i da‘vâdan mezbûr el-Hâc Ahmed’in zimmetini ibrâ ve ıskāt eylediğimde ol dahi ibrâmı kabûl eyledi dediğini mezbûr el-Hâc Ahmed tasdîk edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 19 min-R sene 1205