Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 362 Hüküm no: 469 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kereste bedelinden borcu olan Hüseyin b. İbrahim’in borcunu ödemesi Ma‘rûz Medîne-i Üsküdar’da Balaban İskelesi kurbünde Keresteci Ayan v. Delvet nâm zimmî medîne-i mezbûrede mahfil-i bâbda meclis-i şer‘-i hatîrde Hüseyin b. İbrahim nâm kimesne mahzarında mezbûr Hüseyin bundan akdem yedimden iştirâ ve kabz eylediği aded ve fiyâtı beynimizde ma‘lûm ecnâs kereste semeninden yirmi beş guruş hakkım olup hattâ târih-i i‘lâmdan bir sene mukaddem hesâb görüp ol-mikdâr deyni olduğunu ikrârını hâvî bir kıt‘a temessük i‘tâ etmekle meblağ-ı merkūmun bir guruşunu yedinden ahz bâkī yirmi dört guruşu mezbûr Hüseyin zimmetinde kalmağla hâlâ taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı bâkī-i merkūm yirmi dört guruşun müdde‘î-i merkūm Ayan zimmîye edâsıyla mezbûr Hüseyin şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 22 min-R sene 1205