Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 362 Hüküm no: 470 Orijinal metin no: [40b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İbrahim Ağa’nın kayıkhanesinin bir bölümünü kiraya verdiği Kayıkçılar Kethudası Mehmed Beşe’nin kayıkçı ustaları İbrahim ve Seyyid Ömer’e açtığı kira feshi davasında anlaştıkları Ma‘rûz Medîne-i Üsküdar’a tâbi‘ Kādı karyesinde vâki‘ ma‘lûmü’l-hudûd dört göz kayıkhânenin mutasarrıfı sâhib-i arzuhâl el-Hâc İbrahim Ağa b. Hüseyin tarafından vekîl-i sâbitü’l-vekâlesi el-Hâc Mustafa b. İsmail nâm kimesne meclis-i şer‘-i hatîrde karye-i mezbûrede kayıkcı tâifesinin kethudâları Mehmed Beşe b. Hasan ve ihtiyâr ustalarından İbrahim b. Mehmed ve es-Seyyid Ömer b. Osman nâm kimesneler muvâcehelerinde kayıkhâne-i mezkûre mukaddemâ harâb olmağla bundan akdem bi’l-vekâle tecdîd ve tâife-i mezbûreye beheri birer guruşdan otuz bir aded kayıklari’çün beher mâh otuz bir guruş ücret kavliyle kayıkhâne-i mezkûrenin iki gözünü îcâr ve teslîm eylediğimde onlar dahi istîcâr ve kabûl ve ücret-i mezkûreye cevr ve ezâ etmemek üzere ta‘ahhüd etmişler iken ücret-i mezkûreyi edâdan imtinâ‘ ve kayıkhâne-i mezkûrenin mâ‘adâ iki gözüne vaz‘ olunacak misâfir kayığı ve balıkçı kayığını bi-gayrı hakkın men‘ etmeleriyle ben dahi fesh-i icâre birle mezbûrûnu ihrâc sadedinde olmuş idim el-hâletü hâzihî mahmiye-i İslâmbol’da tâife-i mezbûrenin başkethudâsı es-Seyyid Mehmed Ağa ve Balıkpazarı kethudâsı Abdülmümin ve sâir Müslimîn beynimize tavassut edip zikr olunan kayıkhânenin iki gözünü beher şehr otuz birer guruşdan senevî üç yüz yetmiş iki guruş ücret ile yine mezbûrûna bi’l-vekâle îcâr ve teslîm eylediğimde onlar dahi ber-vech-i muharrer istîcâr ve kabûl ve ücret-i mezkûreyi beher şehr edâ edip mâ‘adâ iki göz kayıkhâneye vaz‘ olunacak misâfir ve balıkçı kayığına müdâhale etmemek üzere herbiri ta‘ahhüd ve bu vechile kat‘-ı münâza‘a eyledik deyü vekîl-i mezbûrun takrîr-i meşrûhunu mezbûrûn Mehmed Beşe ve İbrahim ve es-Seyyid Ömer’den herbiri tasdîk eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 17 min-R sene 1205