Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 375 Hüküm no: 491 Orijinal metin no: [42b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meyhaneci Agop’un vârislerinden oğlu Karabet’in, miras hissesi davasında kardeşi Kirkor ile sulh oldukları Ma‘rûz Medîne-i Üsküdar’da Yenimahalle’de mütemekkin iken bundan akdem hâlik olan Meyhâneci Agop v. Karabet nâm zimmînin verâseti zevce-i metrûkesi Biricik bt. Kigork nâm Nasrâniye ile zevce-i uhrâsından mütevellid sulbî kebîr oğulları Karabet ve Kirkor’a münhasıra ve tashîh meselesi on altı sehm i‘tibârıyla iki sehmi zevcesi merkūmeye ve yedişer sehmden on dört sehmi oğulları merkūmâna isâbeti tahakkukundan sonra merkūm Karabet zimmî medîne-i mezbûrede mahfil-i bâbda meclis-i şer‘-i hatîrde karındaşı merkūm Kirkor zimmî muvâcehesinde mahalle-i mezbûrede vâki‘ ma‘lûmü’l-hudûd meyhâne derûnunda mevcûd gedik ta‘bîr olunur dört fıçı ve elli iskemle ve bir kazgan ve yüz vakıyye hâm sirke ve sâir âlât-ı ma‘lûme babam hâlik-i merkūmun terekesinden olup tashîh-i mezkûr üzere bize mevrûs olmağla ben ve zevce-i mezbûre Biricik Nasrâniye âlât-ı mezkûrede olan dokuz sehm hisse-i i[r]siyyemizi beş yüz otuz beş guruş semen-i makbûza merkūm Kirkor’a bey‘ ve temlik ol dahi ba‘de’l-iştirâ ve’t-temellük kıbel-i şer‘den yedine bir kıt‘a hüccet-i şer‘iye i‘tâ olunmuş idi lâkin merkūm Kirkor zimmî hâlik-i merkūmun terekesinden olmak üzere yüz guruş kıymetli bin vakıyye hâm sirkesini ketm ü ihfâ etmekle bana isâbet eden hisse-i irsiyemi taleb ederim deyü eylediği da‘vâsından bâ-tavassut-ı muslihîn yirmi guruş bedel-i makbûz mukābelesinde merkūm Kirkor zimmî ile sulh olup fîmâ-ba‘d ziyâde müdde‘âsına ve bi’l-cümle hâlik-i merkūmun kalîl ve kesîr cemî‘ terekesine ve hukūk-ı mîrâsa müte‘allika âmme-i de‘âvîden merkūm Kirkor zimmînin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 7 min-şehri Rebî‘ülâhir sene 1205