Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 374 Hüküm no: 490 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali’nin vefat eden Evliyahoca mahallesi mescidi imamı Seyyid Hacı Osman Efendi’den kiraladığı vakıf eve ödediği kira bedelinin verilmesi talebiyle vârislere açtığı davada sulh olduğu Ma‘rûz Medîne-i Üsküdar’da Evliyâhoca mahallesinde sâkin es-Seyyid Ali b. Mehmed nâm kimesne medîne-i mezbûrede mahfil-i bâbda meclis-i şer‘-i hatîrde mukaddemâ mahalle-i mezbûre mescid-i şerîfi imâmı müteveffâ es-Seyyid el-Hâc Osman Efendi b. es-Seyyid Mehmed’in zevce-i metrûkesi Fatıma bt. Abdullah ile sulbiye kebîre kızı Âişe taraflarından vekîl-i şer‘îleri olan sulbî kebîr oğlu es-Seyyid Mehmed Efendi mahzarında sâhibetü’l-hayrât Âişe nâm hatunun mahalle-i mezbûrede vâki‘ ma‘lûmü’l-hudûd bir bâb vakıf menzilin süknâsı evlâdına ve ba‘de’l-inkırâz mahalle-i mezbûre imâmına meşrûta olmağla târih-i i‘lâmdan yirmi sene mukaddem menzil-i mezkûrun bi’l-meşrûta mutasarrıfesi gāibetü ani’l-meclis Hadice nâm hatunun ma‘rifetiyle imâm müteveffâ-yı mezbûr es-Seyyid el-Hâc Osman Efendi menzil-i mezkûru târih-i merkūmda senevî üçer guruş icâre-i müeccele ve otuz guruş mu‘accele ile hilâf-ı şart-ı vâkıf bana îcâr edip lâkin menzil-i mezkûr hâlâ mezbûre Hadice’nin meşrûtün-lehâsı olup müteveffâ-yı mezbûrun ber-vech-i muharrer bana îcârı meşrû‘ olmamağla mezbûre Hadice menzil-i mezkûru ber-mûceb-i fetvâ-yı şerîfe ve bâ-i‘lâm-ı şer‘î yedimden nez‘ ve ahz etmekle ben dahi medfû‘um olan otuz guruş mu‘accel ile icâre-i müeccel-i mezkûreden yirmi senelik altmış guruş ki cem‘an doksan guruş müteveffâ-yı mezbûrun zimmetinde hakkım olmağla müteveffâ-yı mezbûrun terekesinden vaz‘-ı yedi mütehakkık olan oğlu mezbûr es-Seyyid Mehmed Efendi ile müvekkileleri mezbûretân Fatıma ve Âişe’den taleb ederim deyü eylediği da‘vâsından bâ-tavassut-ı muslihîn yetmiş guruş bedel-i makbûza verese-i merkūmûn ile sulh olup husûs-ı mezkûra ve ziyâde müdde‘âsı olan yirmi guruşa müte‘allika âmme-i de‘âvîden mezbûr es-Seyyid Mehmed’in [Mehmed] ile müvekkileleri mezbûretândan herbirilerinin zimmetlerini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 5 min-R sene 1205