Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 377 Hüküm no: 497 Orijinal metin no: [43b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Bekir’den beygir kiralayan Abbas b. Hasan’ın borcunu ödemesi Ma‘rûz Medîne-i Üsküdar’da Atpazarı’nda handa misâfiren sâkin es-Seyyid Bekir b. Mustafa nâm kimesne meclis-i şer‘-i hatîrde Abbas b. Hasan nâm kimesne mahzarında mezbûr Abbas Şâm-ı şerîf’den medîne-i mezbûreye gelince bir re’s bârgirimi kırk yedi guruş ücret ile istîcâr ve ücret-i mezkûrenin yirmi altı guruşunu yedinden ahz ve bâkī yirmi bir guruş hakkımı taleb ederim deyü da‘vâ ve mezbûr Abbas cevâbında müdde‘î-i mezbûra cihet-i mezkûreden bâkī yirmi bir guruş deyni olduğunu ikrâr lâkin müdde‘î-i mezbûrun esnâ-i râhda emriyle mekûlâtına sarf eylediğim altı guruşu ba‘de’l-mahsûb on beş guruş zimmetimde deynim bâkī kalmış idi deyü ba‘de’d-def‘ ve’l-inkâr dâfi‘-i mezbûr def‘-i mezkûrunu beyândan ızhâr-ı acz birle bi’t-taleb gıbbe’t-tahlîfi’ş-şer‘î mûcebiyle meblağ-ı bâkī-i merkūm on beş guruşun edâsıyla mezbûr Abbas şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 4 min-Ca sene 1205