Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 381 Hüküm no: 505 Orijinal metin no: [44a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayreddin Çavuş mescidi vakfına borcu olan Hacı Hasan’ın borcuna kefil olan Osman b. Salih’in, vakfa tecil etme bedeli olarak ödediği parayı Hacı Hasan’dan alması Ma‘rûz Medîne-i Üsküdar’da Debbâğlar mahallesi sükkânından Osman b. Salih nâm kimesne medîne-i mezbûrede meclis-i şer‘-i hatîrde el-Hâc Hasan b. İsmail nâm kimesne mahzarında mezbûr el-Hâc Hasan bundan akdem medîne-i mezbûrede Hayreddin Çavuş mahallesi mescid-i şerîfi vakfı mâlından olmak üzere mütevellîsi hâzır bi’l-meclis Ali Efendi b. Ahmed yedinden istidâne ve kabz eylediği beş yüz seksen guruş müeccel deynine ben bi’l-emr ve’l-kabûl kefîl ve dâmin olup meblağ-ı merkūmdan tecîl olunan beher şehr beşer guruşdan on bir aylık elli beş guruşunu mütevellî-i mezbûr kefâletime binâen taleb [ve] ahz etmekle ben dahi kefâleten edâ eylediğim meblağ-ı merkūm elli beş guruşu mezbûr el-Hâc Hasan’dan bi’l-mürâca‘a taleb ederim deyü ba‘de’d-da‘vâ ve’l-istintâk ve’l-ikrâr alâ-mûcebi ikrârihî meblağ-ı merkūm elli beş guruşun edâsıyla mezbûr el-Hâc Hasan şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 8 min-Ca sene 1205