Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 381 Hüküm no: 506 Orijinal metin no: [44a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanis v. Melkon’un soyulduğu ve darb edildiği iddiasıyla eniştesi David v. Bağdasar’a açtığı davayı ispat edemediği Ma‘rûz Medîne-i Üsküdar’da Yenimahalle’de mütemekkin Evanis v. Melkon nâm zimmî meclis-i şer‘-i hatîrde eniştesi David v. Bağdasar nâm zimmî muvâcehesinde merkūm David zimmî târih-i i‘lâmdan on altı gün mukaddem mahalle-i mezbûrede vâki‘ menzilime girip odamda mevcûd çekmecemi kırıp derûnunda mevcûd iki paralık sa‘leb ve bir kadeh ve bir mikdâr balmumum ile nakden yüz kırk yedi guruşumu fuzîlî ahz ve bi-gayrı hakkın değnek ile başıma ve sâir a‘zâma darb ve şütûm-ı galîza ile şetm ve ırzımı hetk etmekle eşyâ-i mezkûre ve nakd-i merkūm ile darb-ı mezkûrun mûcib-i şer‘îlerini taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i muharrer müdde‘âsını beyân ve isbâta kādir olamayıp bi’t-taleb merkūm David zimmî gıbbe’t-tahlîfi’ş-şer‘î mûcebiyle müdde‘î-i merkūm Avanis zimmî da‘vâ-yı mezkûresiyle merkūm David zimmîye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 10 min-Ca sene 1205