Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 383 Hüküm no: 511 Orijinal metin no: [44b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hasan’ın kızını boşayan Hacı Mehmed Emin’e açtığı kira ve nafaka davasında haksız bulunduğu Ma‘rûz Medîne-i Üsküdar’da Rum Mehmedpaşa mahallesinde sâkin es-Seyyid Hasan b. Mehmed nâm kimesne meclis-i şer‘-i hatîrde Sâbıkā dâmâdı el-Hâc Mehmed Emin b. el-Hâc Ömer nâm kimesne mahzarında mezbûr el-Hâc Mehmed Emin bundan akdem kızım zevcesi gāibetü ani’l-meclis Şerife Âişe ile zevciyet beynlerinde kāime iken benim ile menzilimde ma‘an bilâ-tesmiyeti’l-ücret iki sene sâkine olmalarıyla menzil-i mezkûrun ecr-i mislini mezbûr el-Hâc Mehmed Emin’den taleb ederim deyü takrîri üzere tasaddî eylediği da‘vâsına iltifât olunmayıp lâkin müdde‘î-i mezbûr Mehmed Emin için târih-i i‘lâmdan on beş ay mukaddem taşraya râhî olduğu esnâda zevcesi kızım mezbûrenin umûruna her ne masrûfun olur ise ben mâlımdan edâ ederim deyü bana emir edip ben dahi emriyle yüz yirmi beş guruş masrûfum olmağla taleb ederim deyü da‘vâ ve mezbûr el-Hâc Mehmed Emin cevâbında târih-i i‘lâmdan bir ay mukaddem zevcem mezbûre Âişe ile hul‘ esnâsında müdde‘î-i mezbûr es-Seyyid Hasan meblağ-ı mezkûra müte‘allika âmme-i de‘âvîden benim zimmetimi ibrâ ve ıskāt ben dahi ibrâsını kabûl etmiş idim deyü ba‘de’d-def‘ ve’l-inkâr dâfi‘-i mezkûr def‘-i mezkûrunu udûlden el-Hâc Mehmed Said b. el-Hâc İzzeddin ve el-Hâc Mustafa b. Mehmed nâm kimesneler şehâdetleriyle muvâcehesinde isbât etmeğin mûcebiyle müdde‘î-i mezbûr da‘vâ-yı mezkûresiyle mezbûr el-Hâc Mehmed Emin’e bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 19 min-Ca sene 1205