Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 384 Hüküm no: 512 Orijinal metin no: [44b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Kadı’nın mezraası vakfının mütevellisi İbrahim Dede’nin mezraadan tahsil ettiği zahireleri Sarı Kadı’nın evlatlarına tevzi etmesi Ma‘rûz Medîne-i Üsküdar hâricinde medfûn merhûm ve mağfûrun-leh Sarı Kādı evlâdından Türbedâr Mehmed Emin b. Salih ve Abdülgani b. Abdurrahman ve Lütfullah b. Abdulkadir nâm kimesneler ile zâtları mu‘arrefe Nefise bt. Veli ve Meryem bt. Veli ve Emine bt. Mustafa ve Saliha bt. Ahmed’in zevci ve tarafından vekîli Ebûbekir b. Mustafa nâm kimesne medîne-i mezbûrede mahfil-i bâbda meclis-i şer‘-i hatîrde merhûm-ı mûmâ-ileyhin mezra‘ası vakfının mütevellîsi İbrahim Dede b. Hasan nâm kimesne mahzarında merhûm-ı mûmâ-ileyhin ma‘lûmü’l-hudûd ve’l-kıt‘a mezra‘asından beher sene hâsıla olan a‘şâr-ı şer‘iye cem‘ ve tahsîl ve mutlaka evlâd beynlerinde ale’s-seviye taksîm olunmak meşrût ve amel-i kadîm dahi bu vechile olup mütevellî-i mezbûrun bin iki yüz dört senesine mahsûben kabz eylediği altmış dokuz keyl alef ve yirmi keyl keten tohumu ve otuz beş keyl hınta sene-i mezbûra mahsûben kabz eylediğini târih-i i‘lâm günü ikrâr dahi etmekle teslîme tenbîh olunmak matlûbumuzdur deyü da‘vâ ve mütevellî-i mezbûr cevâbında müdde‘iyûn-ı mezbûrûnun ber-vech-i muharrer müdde‘âlarını ikrâr ve kabzını mu‘terif olduğu altmış altı keyl alef ve on altı [keyl] keten tohumu ve yirmi yedi keyl bir şinik hıntadan ziyâde kabzını inkâr etmeğin müdde‘iyûn-ı mezbûrûn ber-vech-i muharrer ziyâde müdde‘âlarını beyâna ba‘de’l-havâle mütevellî-i mezbûr İbrahim Dede’nin mertebe-i ikrârı olan altmış altı keyl alef ve on altı keyl keten tohumu ve yirmi yedi keyl bir şinik hıntayı vâkıf-ı mûmâ-ileyhin evlâdları beynlerinde taksîm eylemek üzere mütevellî-i mezbûr İbrahim Dede’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 18 min-Ca sene 1205