Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 387 Hüküm no: 517 Orijinal metin no: [45a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Piro v. Marat’ın sattığı kürk bedelinden alacağının taksitler halinde ödenmesi Ma‘rûz Medîne-i Üsküdar’da Yenimahalle’de mütemekkin Piro v. Marat nâm zimmî meclis-i şer‘-i hatîrde Togodoş v. İsteryo nâm zimmî muvâcehesinde merkūm Togodoş zimmî târih-i i‘lâmdan on beş gün mukaddem yedimden iştirâ ve kabz eylediği sincab kürk semeninden elli guruş hakkımın yirmi beş guruşunu yedinden ahz ü kabz yirmi beş guruşu zimmetinde hakkım bâkī kalmağla taleb ederim deyü da‘vâ ve merkūm Togodoş zimmî cevâbında fi’l-hakīka cihet-i mezkûreden bâkī müdde‘î-i merkūma yirmi beş guruş deyni olduğunu ikrâr lâkin târih-i merkūmdan beher şehr beşer guruşdan cem‘an beş ay tamamında meblağ-ı bâkī-i merkūm yirmi beş guruşu kendiye edâ etmek üzere beni tecîl etmiş idi deyü eylediği tecîl da‘vâsını müdde‘î-i merkūm mukırr u mu‘terif olmağın mûcebiyle deyn-i meblağ-ı bâkī-i merkūm yirmi beş guruşu ber-vech-i muharrer müeccelen müdde‘î-i merkūma edâ etmek üzere merkūm To[go]doş zimmî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 19 min-Ca sene 1205