Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 386 Hüküm no: 516 Orijinal metin no: [45a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haseki Mehmed Ağa’nın iltizama aldığı tımardan zarar ettiği ve yaptığı masrafların bölüşülmesi talebiyle açtığı davada ortaklarıyla sulh oldukları Ma‘rûz Medîne-i Üsküdar’a muzâfe Yoros nâhiyesine tâbi‘ Anadolukavağı sükkânından sâhib-i arzuhâl Haseki Mehmed Ağa b. Halil nâm kimesne medîne-i mezbûrede meclis-i şer‘-i hatîrde arzuhâlde isimleri mezkûr Süleyman b. Mehmed ve İsmail b. Abdullah ve Mehmed Salih b. Hasan asâleten ve diğer İsmail b. Abdullah’ın sulbî oğlu ve tarafından ber-vech-i âtî vekîl olduğu mezbûrân Süleyman ve Mehmed şehâdetleriyle sâbit olan es-Seyyid Mustafa nâm kimesneler mahzarlarında medîne-i mezbûreye tâbi‘ Gekbûze nâhiyesinde vâki‘ Akkenisa demekle arîf tımar dokuz sehm i‘tibârıyla iki sehmi benim ve ikişer sehmden altı sehmi mezbûrûn Süleyman ve İsmail ve diğer İsmail’in ve bir sehmi mezbûr Mehmed Salih’in bâ-berât-ı âlî-şân tasarrufumuzda olup tımar-ı merkūmeden sinîn-i sâbıkāda merkūmûn hisselerini beş yüz doksan bir guruş bedel ile iltizâm edegelmiş iken şerîklerim mezbûrûn bin iki yüz dört senesi sene-i sâbıkādan iki yüz iki guruş zammıyla yedi yüz doksan üç guruşa bana ilzâm ben dahi ba‘de’t-ta‘şîr üç yüz doksan iki guruş zarar eylediğimden mâ‘adâ bi’l-iştirâk mâlik olduğumuz tımar-ı merkūm anbarı ta‘mîre muhtâc olduğundan mezbûrûnun bi-şarti’r-rücû‘ emirleriyle masrûfum olan yüz seksen guruş ki cem‘an beş yüz yetmiş iki guruşdan mezbûrûnun sehmlerine isâbet eden dört yüz kırk guruşu taleb ederim deyü da‘vâ onlar dahi cevâblarında iki yüz iki guruş zammıyla bin iki yüz dört senesi yedi yüz doksan üç guruş bedel ile müdde‘î-i mezbûra ilzâm eylediklerini ikrâr lâkin tımar-ı merkūmda zararını ve sâlifü’z-zikr anbarı emriyle yüz seksen guruş sarf eylediğini inkâr etmeleriyle beynlerinde ba‘de vukū‘ı’l-münâza‘a bâ-tavassut-ı muslihîn müdde‘î-i mezbûr Mehmed Ağa tasaddî eylediği zarar da‘vâsından meccânen fâriğ ve anbar mesârifi olan yüz seksen guruşun yüz guruşunu mezbûr Mehmed Ağa ve bâkī seksen guruşu mezbûrûn iktisâmla edâya ba‘de’t-ta‘ahhüd onlar dahi tımar-ı merkūmu ecnebîye ilzâm etmeyip herbir şerîkin izin ve icâzetiyle sâbıkı vech üzere şerîkleri mezbûr Mehmed Ağa’ya ilzâm olunmak üzere beynleri ıslâh ve tevfîk ve mezbûrûndan herbiri râzîler olup bu vechile kat‘- ı münâza‘a eyledikleri mübâşiri iltimâsıyla huzûr-ı âlîlerine i‘lâm olundu. Fî 23 min-Ca sene 1205