Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 391 Hüküm no: 526 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mehmed’in, Seyyid Satılmış’a açtığı darp davasında sulh olduğu Ma‘rûz Medîne-i Üsküdar’da Toygar Hamza mahallesinde sâkin Ahmed b. Mehmed nâm kimesne medîne-i mezbûrede mahfil-i bâbda meclis-i şer‘-i hatîrde es-Seyyid Satılmış b. Süleyman nâm kimesne mahzarında târih-i i‘lâmdan sekiz gün mukaddem mezbûr es-Seyyid Satılmış medîne-i mezbûrede Büyükiskele’de bi-gayrı hakkın eliyle darb ve kakıp iskele-i mezkûrede merbût kayığın üzerine düşürüp sağ tarafımın eğe kemiklerini kesr ve üzeri kara [bere] olmağla mûcib-i şer‘îsini taleb ederim deyü eylediği da‘vâsından bâ-tavassut-ı muslihîn on üç guruş bedel-i makbûza mezbûr es-Seyyid Satılmış ile sulh olup husûs-ı mezkûra ve ber-vech-i muharrer eğesinin kesrine ve kara bereye ve mâ-yuhdesü-minhe müte‘allika âmme-i de‘âvîden mezbûr es-Seyyid Satılmış’ın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 28 min-Ca sene 1205