Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 392 Hüküm no: 529 Orijinal metin no: [46a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiragos v. Kazer’in hizmetinde bulunduğu Tuğlacı Pergan’da kalan alacağının ödenmesi Ma‘rûz Medîne-i Üsküdar’da Selami mahallesinde mütemekkin Kiragos v. Kazer nâm zimmî medîne-i mezbûrede mahfil-i bâbda meclis-i şer‘-i hatîrde Tuğlacı Pergam v. Bogos nâm zimmî muvâcehesinde merkūm Pergam zimmî bundan akdem medîne-i mezbûra tâbi‘ Kādı karyesinde beher bin tuğlayı seksener akçe[ye] kesmek üzere beni istîcâr ben dahi mukāvele olunan tuğlayı işlediğimden sonra ücret-i mezkûremden otuz üç guruş hakkım olup hattâ târih-i i‘lâmdan iki ay mukaddem hesâb görüp ol-mikdâr deyni olduğunu ikrâr ve meblağ-ı merkūmdan on yedi guruşunu ahz ü kabz ve on altı guruşu merkūm Pergam zimmî zimmetinde bâkī kalmağla hâlâ taleb ederim deyü da‘vâ ol dahi cevâbında müdde‘î-i merkūmun müdde‘âsı üzere hîn-i hesâbda ol-mikdâr deyni olduğunu inkâr etmekle müdde‘î-i merkūm Kiragos zimmî ber-vech-i muharrer müdde‘âsını beyândan ızhâr-ı acz birle bi’t-taleb merkūm Pergam zimmîye yemîn teklif olundukda nükûlüyle sâbit olmağın mûcebiyle meblağ-ı bâkī-i merkūm on altı guruşu müdde‘î-i merkūm Kiragos zimmîye edâ ve teslîme merkūm Pergam zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 13 min-Ca sene 1205