Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 399 Hüküm no: 545 Orijinal metin no: [47a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üçpınar Ustası İbrahim’in Feyzullah b. Musa ile kardeşi Ali’de olan alacağının ödenmesi ve iki tarafında birbirlerinden alacakları kaldığı iddialarını ise ispat etmeleri gerektiği Ma‘rûz Medîne-i Üsküdar’da Hayreddin Çavuş mahallesi sükkânından Üçpınar Ustası İbrahim b. Hasan medîne-i mezbûrede mahfil-i bâbda meclis-i şer‘-i hatîrde Feyzullah ve Ali ibney Musa nâm karındaşlar mahzarlarında mezbûrân Feyzullah ve Ali târih-i i‘lâmdan bir sene mukaddem yedimden istidâne eyledikleri yetmiş altı guruş ve bir senelik murâbahasından dahi on bir guruş on altı para ki cem‘an seksen yedi guruş ve on altı parayı taleb ederim deyü da‘vâ onlar dahi cevâblarında müdde‘î-i mezbûrun müdde‘âsı olan meblağ-ı merkūmdan ancak kırk sekiz guruş kabz eylediklerini ikrâr ziyâdeyi inkârlarından mâ‘adâ yedimizden iştirâ eylediği bir çift kara sığır öküzü semeninden altmış sekiz guruş ve nakden medfû‘umuz olan bir defa dokuz guruş ve bir defa dört guruş ki cem‘an seksen bir guruşun kırk guruşun deynimiz olan kırk sekiz guruşa ba‘de’l-mahsûb müdde‘î-i mezbûrun ziyâde makbûzu olan otuz üç guruşu talebleriyle ba‘de’d-def‘ müdde‘î-i mezbûr İbrahim zikr olunan öküzü altmış sekiz guruşa iştirâsını ve nakden dört guruşu kabzını ikrâr ve ziyâde medfû‘ları olan dokuz guruşu inkâr etmeğin mûcebiyle tarafeynden herbiri ziyâde def‘ ve müdde‘âlarını beyâna ba‘de’l-havâle mezbûr İbrahim kabzını mu‘terif olduğu yirmi dört guruşu mezbûrân Feyzullah ve Ali’ye redd ü teslîme şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 9 min-C sene 1205