Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 399 Hüküm no: 544 Orijinal metin no: [47a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hüseyin ile hanımı Zeliha’nın alacak iddiasıyla açtıkları davada haksız bulunduğu Ma‘rûz Medîne-i Üsküdar’da Selami mahallesi sükkânından Mehmed b. Hüseyin ile zâtı mu‘arrefe Zeliha bt. Osman nâm zevcân meclis-i şer‘-i hatîrde es-Seyyid Bayram b. Murtaza mahzarında mezbûr es-Seyyid Bayram târih-i i‘lâmdan on ay mukaddem bi-tarîki’l-karz yedimizden istidâne ve kabz eylediği otuz guruş zimmetinde hakkımız olmağla taleb ederiz deyü da‘vâ ve mezbûr es-Seyyid Bayram cevâbında fi’l-hakīka cihet-i mezkûreden müdde‘iyân-ı mezbûrâna ol-mikdâr meblağ deyni olduğunu ikrâr lâkin müdde‘iyân-ı mezbûrân bundan akdem kızlarıyla hîn-i muhâla‘amda meblağ-ı merkūma müte‘allika âmme-i de‘âvîden benim zimmetimi meccânen ibrâ ve ıskāt ve ben dahi ibrâlarını kabûl etmiş idim deyü takrîrine mutâbık bir kıt‘a sened-i şer‘î ibrâzıyla ba‘de’d-def‘ ve’l-inkâr dâfi‘-i mezbûr es-Seyyid Bayram def‘-i mezkûrunu ve mazmûn-ı i‘lâm-ı mezkûreyi udûlden es-Seyyid Ahmed b. Ali ve Osman b. Mustafa nâm kimesneler şehâdetleriyle vech-i şer‘î üzere muvâcehelerinde isbât etmeğin mûcebiyle müdde‘iyân-ı mezbûrân da‘vâ-yı mezkûreleriyle mezbûr es-Seyyid Bayram’a bî-vech-i şer‘î mu‘ârazadan men‘ < > olunduğu bi’l-iltimâs huzûr-ı âlîlerine i‘lâm olundu. Fî 14 min-C sene 1205