Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 400 Hüküm no: 547 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İbrahim Ağa’nın Yenişehir’deki çeşme vakfının mütevelliliğine Emetullah Hatun’un tayini Der-i devlet-mekîne arz-ı dâ‘î-i kemîne oldur ki nezâret-i dâ‘îlerinde olan evkāfdan medîne-i Üsküdar’da Ahmedçelebi mahallesinde ashâb-ı hayrâtdan merhûm ve mağfûrun-leh el-Hâc İbrahim Ağa hayatında ber-mûceb-i vakfiye-i ma‘mûlün-bihâ Vilâyet-i Anadolu’da Bursa Yenişehri kasabasında vâki‘ binâ ve ihyâ eylediği çeşme mühimmâtı ve yolları ta‘mîri’çün vakf-ı sahîh ile vakf eylediği nukūd ve akār-ı mevkūfesinin tevliyetini yevmî beş akçe vazîfe ile evvelen kendiye ve ba‘dehû zevcesi Rukiye Hatun’a ba‘dehû evlâd-ı evlâdına ba‘dehû akrabâsının eslah ve erşedine ba‘dehû atik ve utekātına şart ve ta‘yîn eyledikden sonra bilâ-veled vefât edip ve meşrûtün-lehâ olan zevcesi mezbûre Rukiye Hatun dahi kendiden mukaddem vefât etmekle meşrûtün-lehâdan vâkıf-ı mezbûrun akreb akrabâsından eslah ve erşedîni ihbâr olunup kız karındaşı kızı işbu bâ‘ise-i ubûdiyet Şerife Emetullah bt. es-Seyyid Mehmed nâm hatun mevcûde olmağla tevliyet-i mezkûre şart-ı vâkıf üzere mezbûre Şerife Emetullah Hatun’a tevcîh ve yedine berât-ı âlî-şân i‘tâ olundukdan sonra mûcib-i azl ve ref‘ olunur bir hâli yoğiken vâkıf-ı mezbûrun derecede müsâvî âhar kız karındaşı oğlu Mehmed ben eslah ve erşedim deyü mezbûrenin ref‘inden kendi üzerine berât ettirip beş on seneden beri Rumeli’nde Malkara kazâsında a‘yânlık dâ‘iyesiyle mütemekkin ber-seref ve mübezzir olmağla mâl-ı vakf-ı mezbûrdan akāra tebdîli meşrûta olan üç bin guruş ile musakkafâtından bir bâb dükkân mu‘acceli olan dokuz yüz guruş ki cem‘an üç bin dokuz yüz guruşu akāra tebdîl etmeyip kendi umûruna sarfla istihlâk eylediğinden mâ‘adâ hâlâ kazâ-i mezbûre ahâlisinin mezbûr Mehmed zimmetinde zuhûr eden elli sekiz bin guruş alacak hakları için Kal‘a-i Sultânî’de mahbûs ve vakf-ı mezbûr külliyen muzmahil olacağı zâhir ve mezbûre Şerife Emetullah Hatun meşrûtün-lehâdan eslah ve erşed ve umûr-ı vakfı istikāmet üzere rü’yete kādire olduğu bî-garaz ehl-i vukūfdan el-Hâc Ali Ağa b. Mehmed ve Mustafa Ağa b. el-Hâc Ali ve Abdulkadir Hamdi Efendi b. Ahmed ve Abdi Ağa b. Hüseyin ve Halil Dede b. Abdullah ve İsmail b. İbrahim ve Mehmed b. Halil ve Mehmed Emin Ağa b. el-Hâc Ali ve Molla Mehmed b. İbrahim ve Molla Mehmed Tâhir b. Süleyman ve Ahmed Ağa b. el-Hâc Mehmed nâm kimesnelerin alâ-tarîki’ş-şehâde ihbârlarıyla nümâyân olmağın tevliyet-i mezkûre mezbûr Mehmed’in ref‘inden şart-ı vâkıf üzere mezbûre Şerife Emetullah Hatun’a tevcîh ve yedine berât-ı âlî-şân ihsân buyurulmak ricâsına bi’l-iltimâs pâye-i serîr-i a‘laya arz olundu. Bâkī fermân hazret-i men lehü’l-emrindir. Fi’l-yevmi’l-hâdî ve’l-ışrîn min-Cumâdelâhire li-sene hamse ve mi’eteyn ve elf. El-abdü’d-dâ‘î li’d-Devleti’l-aliyyeti’l-Osmâniye Salih İsmail Esîrîzâde el-Kādı-i bi-medîneti Üsküdar