Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 401 Hüküm no: 548 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. İsmail’in, Tavâşî Hasan mahallesi camiine vakf edilen evi müezzin Molla Abdülhalim b. Mehmed Emin’in zapt ettiği iddiasıyla açtığı davasında reddedildiği Ma‘rûz Medîne-i Üsküdar’da Tavâşî Hasan mahallesinde sâkine ve zâtı mu‘arrefe Rukiye bt. İsmail nâm hatun medîne-i Üsküdar’da [mahfil-i] bâbda meclis-i şer‘-i hatîrde mahalle-i mezbûre câmi‘-i şerîfinin berât-ı âlî-şân ile hâlâ müezzini olan Molla Abdülhalim b. Mehmed Emin mahzarında müezzin-i mezbûrun yedinde olan bin yetmiş dokuz senesi târihiyle müverraha bir kıt‘a vakfiye mantûku üzere sâhibetü’l-hayrât müteveffât Neslihan bt. el-Hâc Mustafa nâm hatun mahalle-i mezbûrede vâki‘ ma‘lûmü’l-hudûd bir bâb mülk menzilini târih-i mezkûrda vakf-ı sahîh ile vakf ve tevliyet-i tasarrufunu evvelen kendiye ba‘dehâ zevci olan Rıdvan Beşe’ye ba‘dehû zevci Rıdvan Beşe’nin evlâd-ı evlâdına ba‘dehû mezbûr Rıdvan Beşe’nin âhar zevcesi Gülistan Hatun’a ba‘dehâ mezbûre Gülistan Hatun’un batnen ba‘de batnin evlâd-ı evlâdına ba‘de’l-inkırâz mahalle-i mezbûre câmi‘-i şerîfinde her kim müezzin olur ise menzil-i mezkûrda dilerse sâkin ve diler ise âhara îcâr eylesin deyü şart ve ta‘yîn edip hâlâ menzil-i mezkûrun nısf-ı şâyi‘ine bi’l-icâreteyn mutasarrıfe olan Emine nâm hatun bilâ-veled vefât edip nısf menzil-i mezkûr mahlûl olmağla müezzin-i mezbûr zabt ve âhara îcâr murâd edip lâkin ben vâkıfe-i mezbûrenin evlâd-ı evlâdından olup nısf menzil-i mezkûrun nevbet-i tasarrufu benim olup müezzin-i merkūm Abdülhalim bi-gayrı hakkın tasarruf ve zabt murâd etmekle menzil-i mezkûra ber-vech-i muharrer müdâhalesi men‘ olunmak matlûbumdur deyü eylediği da‘vâsını tashîh ve beyân eyleyemediğinden mâ‘adâ müezzin-i merkūm Abdülhalim menzil-i mezkûra kırk seneden mütecâviz babam müteveffâ-yı mezbûr Mehmed Emin ber-vech-i meşrûtiyet zabt ü tasarruf etmekle ben dahi ber-vech-i muharrer zabt ü tasarruf ederim deyü eylediği def‘ini müdde‘iye-i mezbûre dahi ikrâr ü i‘tirâf etmekle müdde‘iye-i mezbûre menzil-i mezkûra bî-vech-i şer‘î müdâhalesi men‘ ü def‘ olunduğu bi’l-iltimâs huzûr-ı âlîlerine i‘lâm olundu. Fî 6 min-C sene 1205