Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 422 Hüküm no: 435 Orijinal metin no: [101a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Hafız el-Hâc Mehmed Efendi’nin Ayşe bt. Mehmed ile Arnavud İbrahim Beşe’ye sattığı fırını aynı zamanda başkasına da kiraya verdiğinden alıcıların paralarını iade ettiği Dergâh-ı âlî -dâme mahfûfen bi’l-me‘â[lî]- yeniçerilerinin altmış altıncı cemâ‘ate mahsûs oda neferâtından gāib ani’l-meclis Karagöz İbrahim Beşe b. Abdullah b. Abdurrahman nâm yeniçerinin zevcesi ve tarafından husûs-ı âti’l-beyâna vekîl olduğu zâtını ârifân olup mahmiye-i İstanbul’da Cerrâh Paşa Câmi‘-i şerîfi kurbünde Canbaziye Mahallesi sükkânından Ali Çelebi b. İsmail ve Molla Ahmed b. İbrahim şehâdetleriyle şer‘an sâbit ve sübût-ı vekâletine hükm-i şer‘î lâhık olan Âişe bt. Mehmed nâm hatun vekâleten ve Arnavud İbrahim Beşe b. Abdullah asâleten meclis-i şer‘-i şerîf-i enverde bâ‘isü hâze’l-kitâb [101b] Ekmekçi Hâfız el-Hâc Mehmed Efendi b. Osman mahzarında her biri bi’l-asâle ve bi’l-vekâle ikrâr ve takrîr-i kelâm edip mezbûr el-Hâc Mehmed Efendi bundan akdem tasarrufunda olan Aksaray sûkunda merhûm Yusuf Paşa çeşmesi kurbünde vâki‘ simidci fırını gediğinden her rub‘unu yüz on beşer guruşdan iki rub‘unu cem‘an iki yüz otuz guruş semen-i medfû‘ ve makbûza bize bey‘ ve teslîm biz dahi ber-vech-i muharrer iştirâ ve tesellüm eylediğimezden sonra zikr olunan fırını sâhibi âhara îcâr ettiğinden mâ‘adâ akd-i mezbûrun fesâdına binâen mârru’z-zikr gediği mezbûr Hâfız el-Hâc Mehmed Efendi’ye red ve ber-vech-i muharrer semen olmak üzere medfû‘umuz olan meblağ-ı mecmû‘-ı mezkûru mezbûr Hâfız el-Hâc Mehmed Efendi’den ber-vech-i muharrer taleb ve da‘vâ eylediğimizde ol dahi ikrâr u i‘tirâf etmeğin mûcebiyle kıbel-i şer‘den ba‘de’t-tenbîh mezbûr Hâfız el-Hâc Mehmed Efendi meblağ-ı mecmû‘-ı mezkûrdan yüz on beşer guruşu her birimize def‘ ve teslîm biz dahi yedinden ahz u kabz eyledik min-ba‘d meblağ-ı mezkûrdan mezbûr Hâfız el-Hâc Mehmed Efendi yedinde ve zimmetinde bir akçe ve bir habbe hakkımız bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: Ömer Çelebi b. el-Hâc Mehmed, Salih Ali Çelebi b. Mahmud, Mehmed Ağa b. Ali, Hasan Ağa b. Abdullah, Ali Ağa b. Mehmed, Mehmed Çelebi b. Abdullah.