Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 411 Hüküm no: 572 Orijinal metin no: [49a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Emine Hanım’ın vârisleri arasında çıkan anlaşmazlığın giderildiği Ma‘rûz; Medîne-i Üsküdar’a muzâfe Yakacık karyesinde sâkine iken bundan akdem vefât eden Emine bt. Mehmed b. Abdullah’ın verâseti sadriye kebîre kızı Şerife Zeyneb bt. es-Seyyid Mehmed ile li-ebeveyn kız karındaşı Ümmügülsüm nâm hatuna münhasıra ve terekesinin nısfı kızı mezbûreye ve nısf-ı âharı kız karındaşı merkūma isâbeti tahakkukundan sonra arzuhâlde ismi mezkûre ve zâtı mu‘arrefe uht-i mezbûre Ümmügülsüm hatun oğlu Mustafa b. Ahmed hâzır olduğu hâlde medîne-i mezbûrede meclis-i şer‘-i hatîrde tereke-i müteveffât-ı mezbûreye vâzı‘atü’l-yed olan kezâlik zâtı mu‘arrefe sâhibe-i arzuhâl bint-i mezbûre Şerife Zeyneb ile bi’t-terâzî terâfu‘larında kız karındaşım müteveffât-ı mezbûrenin bi’l-cümle terekesi olan karye-i mezbûrede vâki‘ her biri ma‘lûmü’l-hudûd bir bâb mülk menzil ile üç kıt‘a kürûmu mülk bağ ve üç yüz guruş kıymetli ber-mûceb-i defter-i müfredât eşyâ-i mütenevvi‘a-i ma‘lûme ve nakd üç yüz guruşunu kızı mezbûre Şerife Zeyneb bi-gayrı hakkın fuzûlî kabz ve tasarruf etmekle emlâk-i mezkûre ve nakd-i merkūmeden bana isâbet eden nısf hisse-i irsiyemi taleb ederim deyü da‘vâ ve mezbûre Şerife Zeyneb cevâbında fi’l-hakīka anası müteveffât-ı mezbûrenin mecmû‘-ı terekesine vaz‘-ı yedini ikrâr lâkin anam müteveffât-ı mezbûre hâl-i hayatında fevtinden bir sene mukaddem işbu yedimde olan bir kıt‘a mübâya‘a hücceti nâtıka olduğu üzere emlâk ve eşyâsını yüz elli guruşa bana bey‘ ve temlik ve semeni mutâlebesinden zimmetimi ibrâ edip mülk-i müşterâm olduğuna binâen vaz‘-ı yed ederim deyü takrîr-i meşrûhasına mutâbık ve târih-i mezkûrda Ahîçelebi Mahkemesi’nde nâibü’ş-şer‘ olan müderrisîn-i kirâmdan Hamîdî Mustafa Efendi imzâsıyla mümzât ve hâtemi ile mahtûm bir kıt‘a hüccet-i şer‘iye ibrâzından mâ‘adâ ba‘de’l-vefât târih-i i‘lâmdan üç ay mukaddem müdde‘iye-i mezbûre Ümmügülsüm hatun tarafından vekîl-i sâbitü’l-vekâlesi hâzır-ı merkūm Mustafa bundan akdem medîne-i mezbûrede nâibü’ş-şer‘i’ş-şerîf olan müderrisîn-i kirâmdan Şerif Mehmed Emin Efendi huzûrunda zikrleri mürûr eden emlâk ve eşyâ ve nakdi bi’l-vekâle benden taleb ve da‘vâ ben dahi ber-vech-i muharrer müdde‘âmı beyân esnâsında bâ-tavassut-ı muslihîn otuz beş guruş bedel-i makbûz mukābelesinde bi’l-vekâle benim ile sulh olup müteveffât-ı mezbûrenin dâhil-i hüccet ve hâric-ez-hüccet cemî‘ terekesinden ve bi’l-cümle husûs-ı mîrâsa müte‘allika âmme-i de‘âvîden benim zimmetimi ibrâ ve iskāt ben dahi ibrâsını kabûl edip kıbel-i şer‘den yedime bir kıt‘a ibrâ hücceti i‘tâ olunmuş idi deyü kezâlik takrîr-i meşrûhasına mutâbık ve nâib-i mûmâ-ileyhin imzâsıyla mümzâ ve mahtûm diğer bir kıt‘a hüccet-i şer‘iye ibrâzıyla ba‘de’d-def‘ ve’l-inkâr dâfi‘a‘-i mezbûre Şerife Zeyneb Hatun def‘-i mezkûrunu ba‘de’t-ta‘dîl ve’t-tezkiye şehâdetleri makbûle olan Molla Ahmed b. İbrahim ve Hüseyin Yazıcı b. Hasan nâm kimesneler şehâdetleriyle müdde‘iye-i mezbûre muvâcehesinde vech-i şer‘î üzere isbât etmeğin mûcebiyle müdde‘iye-i mezbûre Ümmügülsüm da‘vâ-yı mezkûresiyle mezbûre Şerife Zeyneb Hatun’a bî-vech-i şer‘î mu‘ârazadan men‘ olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 23 min-C sene 1205