Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 412 Hüküm no: 573 Orijinal metin no: [49a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli b. Hüseyin ile Hancı Nikagos’un aralarındaki alacak verecek davasında sulh oldukları Ma‘rûz; Mahmiye-i İslâmbol’da Paşakapısı kurbünde sâkin ve derûn-ı arzuhâlde mezkûrü’l-ism Abdullah, nâm-ı diğer Veli b. Hüseyin nâm kimesne Medîne-i Üsküdar’da meclis-i şer‘-i hatîrde arzuhâl eden Hancı Nikagos v. Toros nâm zimmî muvâcehesinde merkūm Nikagos zimmî târih-i i‘lâmdan iki sene mukaddem yedimden iştirâ ve kabz eylediği bir re’s kestane dorusu at semeninden elli beş guruş hakkım ile bi-tarîki’l-emâne yedine teslîm eylediğim kıymetleri yirmi guruşa bâliğ bir at gemi ve bir eğer ve bir keçeyi hâlâ taleb ederim deyü da‘vâ ve merkūm Nikagos zimmî cevâbında müdde‘î-i mezbûr yedinden zikr olunan atı elli beş guruşa iştirâsını ikrâr ve zikrleri mürûr eden gem ve eğer ve keçeyi inkârından mâ‘adâ ve meblağ-ı merkūm elli beş guruşu dahi târih-i merkūmdan kendiye tamamen edâ ve teslîm etmiş idim deyü eylediği def‘ini beyân esnâsında müdde‘î-i mezbûr eylediği da‘vâsından bâ-tavassut-ı muslihîn yirmi guruş bedel-i makbûz mukābelesinde merkūm Nikagos zimmî ile sulh olup ziyâde müdde‘âsı olan otuz beş guruş at semenine ve sâlifü’z-zikr gem ve eğer ve keçeye ve bi’l-cümle husûs-ı mezkûra müte‘allika âmme-i de‘âvîden merkūm Nikagos zimmînin zimmetini ibrâ ve ıskāt ve merkūm Nikagos zimmî dahi medfû‘u olan bedel-i sulh-ı merkūm yirmi guruşa müte‘allika âmme-i de‘âvîden mezbûr Veli’nin zimmetini ibrâ ve ıskāt ve her biri âharın ibrâsını kabûl edip ol-vechile kat‘-ı münâza‘a eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 4 min-B sene 1205