Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 413 Hüküm no: 575 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Saadeddin’in Ahmed Ağa’daki alacaklarını tahsil ettiği Ma‘rûz; Mahmiye-i İslâmbol’da Sultan Mehmed Câmi‘-i şer‘î [şerîfi] kurbünde sâkin sâhib-i arzuhâl es-Seyyid Mehmed Saadeddin [b.] es-Seyyid Halil Hamid nâm kimesne Medîne-i Üsküdar’da meclis-i şer‘-i hatîrde sâbıkā Sivrihisâr Voyva[da]sı arzuhâlde ismi mezkûr Ahmed Ağa b. Mehmed mahzarında [eylediği] da‘vâsında mezbûr Ahmed Ağa’ya emir ve talebiyle işbu târih-i i‘lâmdan dört gün mukaddeme gelince bilâ-tesmiyeti’l-ecr yedi ay hizmet etmemle şühûr-ı mezkûrede müstehak olduğum ecr-i mislim ile yedimden istikrâz ve kabz eylediği altmış beş guruş ve bi-şarti’r-rücû‘ emriyle matbahına harc ü sarf eylediğim kırk dokuz guruş gāib ani’l-beled Hekimzâde Halil Ağa zimmetinde alacak hakkım olan yirmi üç guruşu mezbûrdan ahz etme, ben edâ ederim dediğine binâen yirmi üç guruşla iki yüz yetmiş yedi guruş[u taleb etmem] ile bi-gayrı hakkın beni darb ve habsetmekle mûcibini mezbûr Ahmed Ağa’dan taleb ederim deyü da‘vâ ol dahi cevâbında ancak beş ay hizmetinde olduğunu ikrâr ve mâ‘adâ mutâlebesini inkâr etdikde beynlerinde ba‘de-vukū‘ı’l-münâza‘a bâ-tavassut-ı muslihîn müdde‘î-i mezbûr es-Seyyid Mehmed Saadeddin tasaddî eylediği da‘vâ-yı mezkûresinden beynlerinde ma‘lûm ve mu‘ayyen bir re’s kır at bedel-i sulh olmak üzere merkūm Ahmed Ağa ile sulh olup ol dahi sulh-ı mezkûru ba‘de’l-kabûl müdde‘î-i mezbûr es-Seyyid Mehmed Saadeddin’e def‘ ü teslîm etdikde ol dahi kabz edip bi’l-cümle husûs-ı mezkûra ve işbu târih-i i‘lâma gelince beynlerinde cereyân eden hukūk-ı şer‘iyeye müte‘allika âmme-i de‘âvîden her biri âharın zimmetini ba‘de’l-ibrâ ve’l-kabûl kat‘-ı münâza‘a eyledikleri tescîl ve mübâşiri çavuş kulları iltimâsıyla huzûr-ı âlîlerine i‘lâm olundu. Fî 5 min-Receb sene 1205