Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 414 Hüküm no: 577 Orijinal metin no: [49b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Ali’nin taş ile yaralanarak öldüğünün tespit olunduğu Ma‘rûz; Bi’l-iltimâs kıbel-i şer‘den meb‘ûs Mehmed Esad Efendi dâ‘îleri Medîne-i Üsküdar’da Kefçe mahallesi sükkânından iken vech-i âtî üzere taş ile mecrûhan fevt olup medîne-i mezbûre mahkemesi kurbünde vâki‘ Gülfam hatun Câmi‘-i şerîfi havlusuna dest-gîr ile ihzâr olunan es-Seyyid Mehmed Ali’nin meyyiti üzerine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde mezbûr Mehmed Ali’nin babası es-Seyyid Mehmed b. İbrahim ve vâlidesi mu‘arrefetü’z-zât Safiye bt. Abdullah nâm zevcân meclis-i ma‘kūd-ı mezkûrda her biri bast-ı kelâm edip gāib ani’l-meclis Hüseyin b. Mahmud nâm kimesne târih-i i‘lâmdan sekiz gün mukaddem mahalle-i mezbûrede Doğancılar meydanında arpacı dükkânı önünde müteveffâ-yı mezbûr oğlumuz Mehmed Ali’nin taş ile sağ şakağı üzerinden darb ve cerh edip müte’essiren fevt olmağla keşf ve mu‘âyene olunmak matlûbumdur dediklerinde cerrâh Molla Ali ve sâir Müslimîn ile a‘zâsına nazar olundukda fi’l-hakīka mezbûr es-Seyyid Mehmed Ali sağ şakağı üzerinden mecrûhan fevt olduğunu mezbûr dâ‘îleri mahâllinde ba‘de’t-tahrîr ve’l-inhâ defnine izin birle huzûr-ı âlîlerine i‘lâm olundu. Fî 28 min-C sene 1205