Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 416 Hüküm no: 580 Orijinal metin no: [49b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa’nın vakıf menzilden hak iddia etmesinin hukuksuz olduğu Ma‘rûz; Vilâyet-i Anadolu’da Ayandon kazâsı ahâlisinden olup Medîne-i Üsküdar’da Hasanağa mahallesinde misâfiren sâkin Mehmed b. Mustafa nâm kimesne meclis-i şer‘-i hatîrde mahalle-i mezbûre mescid-i şerîfinin müezzini ve zikri âtî menzilin bi’l-meşrûta mütevellîsi Molla Abdülhalim b. Mehmed Emin nâm kimesne mahzarında mahalle-i mezbûrede vâki‘ lede’l-ahâli ve’l-cîrân ma‘lûmü’l-hudûd bir bâb vakıf menzil bundan akdem vâlidem Âişe bt. Mustafa’nın taht-ı tasarrufunda iken on beş sene mukaddem vefât edip menzil-i mezkûr bana ve karındaşım Emine Hatun’a intikāl eyledikde kız karındaşım mezbûr Emine Hatun menzil-i mezkûrdan bana intikāl eden nısf hissemi bedel-i ma‘lûm mukābelesinde âhara ferâgat etdikden sonra karındaşım mezbûre Emine bilâ-veled fevt olup nısf hissesi mahlûl ve cânib-i vakfa âid olmağla nısf menzil-i mezkûru mütevellî-i mezbûr zabt ve âhara îcâr murâd etmekle hâlâ mahlûl olan nısf menzil-i mezkûru müteveffât-ı mezbûrenin fuzûlî âhara ferâgat ve kabz-ı bedel eylediği nısf hissem mukābelesinde bana teslîm eylesin deyü takrîri üzere tasaddî eylediği da‘vâ-yı gayr-ı meşrû‘asına iltifât olunmadığı bi’l-iltimâs huzûr-ı âlîlerine i‘lâm olundu. Fî 4 min-Receb sene 1205