Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 416 Hüküm no: 581 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hanım’ın tasarrufundaki yarım hisse vakıf menzili kendi rızasıyla Ali b. İbrahim’e devrettiği Ma‘rûz; Medîne-i Üsküdar’da Rum Mehmedpaşa mahallesinde sâkin sâhib-i arzuhâl Ali b. İbrahim nâm kimesne meclis-i şer‘-i hatîrde derûn-ı arzuhâlde mezkûretü’l-ism, zâtı mu‘arrefe Hanife bt. Abdullah nâm hatun mahzarında merhûm Minkārîzâde Yahya Efendi Vakfı’ndan olmak üzere yevmî bir akçe icâre-i müecceleli mahalle-i mezbûrede vâki‘ bir bâb vakıf menzilin nısfı benim ve nısf-ı âharı mezbûre Hanife Hatun’un olup menzil-i mezkûrda bir sene sâkine olmağla ben dahi bir sene sâkin olmak içün mezbûre Hanife Hatun’a menzil-i mezkûru tahliye ve bana teslîme tenbîh olunmak matlûbumdur deyü da‘vâ sadedinde olup beynlerinde ba‘de-vukū‘ı’l-münâza‘a bâ-tavassut-ı muslihîn mezbûr Hanife Hatun menzil-i mezkûrda olan nısf hissesini bi’r-rızâ bâ-ma‘rifet-i mütevellî üç yüz elli guruş bedel mukābelesinde mezbûr Ali’ye ferâğ-ı kat‘î-i mu‘teber ile ferâğ ve tefvîz eyledikde ol dahi tefevvüz ve kabûl edip kat‘-ı münâza‘a eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 9 min-Receb sene 1205