Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 417 Hüküm no: 583 Orijinal metin no: [50a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Mehmed’in kardeşi Emine’ye kıymetli eşyalarını emanet bıraktığı hakkındaki iddiasını ispatlayamadığı Ma‘rûz; Medîne-i Üsküdar’da İhsâniye mahallesinde sâkin İbrahim b. Mehmed nâm kimesne meclis-i şer‘-i hatîrde li-ebeveyn kız karındaşı mu‘arrefetü’z-zât Emine binti’l-mezbûr Mehmed nâm hatun muvâcehesinde târih-i i‘lâmdan üç sene mukaddem kız karındaşım mezbûre Emine Hatun yedine bi-tarîki’l-vedî‘a vaz‘ ve teslîm eylediğim mecmû‘-ı kıymetleri iki yüz altmış guruşa bâliğ yirmi beş billûr bardak ve iki kaliçe ve bir çuka biniş ve bir Sakız şalı kuşak ve bir güvez çuka cebe ve bir çift piştov ve bir top çit bezimi karındaşım mezbûre Emine Hatun’dan taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyândan izhâr-ı acz edip talebiyle mezbûre Emine Hatun gıbbe’t-tahlîfi’ş-şer‘î mûcebiyle müdde‘î-i mezbûr İbrahim da‘vâ-yı mezkûresiyle mezbûre Emine Hatun’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 11 min-B sene 1205