Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 424 Hüküm no: 437 Orijinal metin no: [101b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hanım’ın evini İsmail Ağa b. Musa’ya sattığı Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i şerîf-i enverden irsâl olunan Mevlânâ Müezzinzâde Mehmed Efendi Dârü’l-hilâfeti’l-aliyye Kostantıniyye el-mahmiyede vâki‘ Yarhisar Mahallesi’nde sâkine Fâtıma Hanım bt. el-merhûm Kapıcıbaşı Şirin İbrahim Ağa’nın menziline varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i şerîf ettikde zâtı mahalle-i mezbûre imâmı Mehmed Emin Efendi b. ( ) ve İbrahim Beşe b. Mehmed ve Mustafa Çelebi b. Beşir Ağa ta‘rîfleriyle mu‘arrefe olan mezbûre Fâtıma Hanım meclis-i ma‘kūd-ı mezkûrda bâ‘isü hâze’l-kitâb İsmail Ağa b. Musa mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan merhûm Mu‘îd Ahmed Efendi Vakfı odaları ve bir tarafdan Sinan Ağa Vakfı olan menzil ve bir tarafdan ba‘zan Abdullah Efendi menzili ve ba‘zan gallesi mahalle-i mezbûre imâmlarına meşrûta olup hâlâ bi’l-icâreteyn taht-ı tasarrufumda olan menzil ve ba‘zan Mukīmzâde kayın atası merhûm Hüseyin Efendi Vakfı odalar[ı] ve bir tarafdan tarîk-i âm ile mahdûd ve hâriciyyesinde ulyâda iki bâb oda ve bir sofa ve dehlîz ve bir abdesthâne ve kenîf ve üzerinde bir sagīr hazîne odası ve vustâda bir oda ve dehlîz ve abdesthâne ve bir kenîf ve süflâda bir arpa anbarı ve ahır ve bir kenîf ve bir mikdâr havlu ve dâhiliyesinde ulyâda oda ve dehlîz ve kenîf ve vustâda bir bâb oda ve süflâda bir kilâr ve bir oda ve câmekân ve hamam [102a] ve matbah ve bir kenîf ve bir su mahzeni ve havlu ve zât-ı eşcâr-ı müsmire ve gayr-ı müsmire bahçeyi muhtevî işbu akd-i meclis olunan mülk menzilimi cümleti’t-tevâbi‘ [ve] levâhıkıyla tarafeynden îcâb ve kabûlü hâvî bey‘-i kat‘î ile mezbûr İsmail Ağa’ya iki bin beş yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr iki bin beş yüz guruşu müşteri-i merkūm İsmail Ağa yedinden tamamen ahz u kabz eyledim. Fîmâ-ba‘d menzil-i mahdûd-ı mezkûr mezbûr İsmail Ağa’nın mülk-i müşterâsı ve hakk-ı sırfı olmuşdur. Keyfemâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ve ma‘an ba‘s olunan Çukadâr Mustafa b. Abdullah ve Muhzır İbrahim b. Ahmed ile meclis-i şer‘a gelip her biri inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâdî aşere min-şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: İmâm Mehmed Efendi b. ( ), es-Seyyid Mehmed b. İsmail, el-Hâc Süleyman b. Mehmed, Mustafa Çelebi b. Hüseyin, İbrahim Çelebi b. el-Hâc Mustafa, Ahmed Ağa b. Mustafa, Hasan Çelebi b. Abdullah, es-Seyyid Ali b. Mustafa, es-Seyyid el-Hâc Hasan b. el-Hâc ( ), Halil Beşe b. Ahmed, Çukadâr Mustafa b. Abdullah.