Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 425 Hüküm no: 438 Orijinal metin no: [102a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Abdullah ile eşi Ali b. Mustafa’nın muhala‘a yoluyla boşandıkları Mahmiye-i İstanbul’da Haydarpaşa Mahallesi’nde sâkine olup zâtı Mustafa b. Abdullah ve Abdülbâki Çelebi b. Halil nâm kimesneler ta‘rîfleriyle mu‘arrefe olan Rukiye bt. Abdullah nâm hatun meclis-i şer‘-i hatîr-i lâzımü’t-tevkīrde zevc-i dâhili işbu bâ‘isetü’l-vesîka Ali b. Mustafa mahzarında ikrâr ve takrîr-i kelâm edip mezbûr Ali zevcim olup beynimizde hüsn-i zindegānemiz olmamağla zimmetinde mütekarrir ve ma‘kūdun-aleyh bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve kendiye medfû‘um olan yedi guruş bedel-i hul‘ olup meûnet-i süknâm dahi kendi üzerime olmak üzere zevcim mezbûr Ali ile muhâla‘a-i sahîha-i şer‘iyye ile muhâla‘a eylediğimde ol dahi ber-vech-i muharrer hul‘-ı mezkûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: Ahmed Çelebi b. Hasan, el-Hâc Mehmed Çelebi b. Abdullah, es-Seyyid Ali Çelebi b. Mustafa, Salih Çelebi b. Süleyman.