Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 423 Hüküm no: 596 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise Hanım’ın borcunu ödemesi Ma‘rûz; Medîne-i Üsküdar’da Gerede mahallesinde sâkin es-Seyyid el-Hâc Mehmed b. es-Seyyid Ahmed medîne-i mezbûrede meclis-i şer‘-i hatîrde mu‘arrefetü’z-zât Nefise bt. Mustafa nâm hatun mahzarında mezbûre Nefise hatun târih-i i‘lâmdan yedi ay mukaddem yedimden istikrâz ve kabz ve umûruna sarfla istihlâk eylediği kırk dört guruş zimmetinde hakkım olmağla taleb ederim deyü da‘vâ ve mezbûre Nefise hatun cevâbında fi’l-hakīka müdde‘î-i mezbûr yedinden kırk dört guruş ahzını ikrâr lâkin gāib ani’l-meclis el-Hâc Süleyman nâm kimesne zimmetinde cihet-i karzdan olan yüz elli guruş hakkımın devr-i şer‘î ile ilzâm ve iltizâm olunan iki senelik kırk beş guruş nemâsına tarafeynden bi’l-emr ve’l-kabûl kefîl ve dâmine olmağla kefâletine binâen bana teslîm edip ben dahi ahz etmiş idim deyü eylediği def‘ini beyâna ba‘de’l-havâle alâ-mûcebi ikrârihâ meblağ-ı merkūm kırk dört guruşu müdde‘î-i mezbûra edâ ve teslîme mezbûre Nefise Hatun’a şer‘an tenbih olunduğu bi’l-iltimâs huzûr-ı âlîlerine i‘lâm olundu. Fî 7 min-Receb sene 1205