Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 424 Hüküm no: 599 Orijinal metin no: [51a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vartan v. Serkiz’in borcundan kalan kısmını ödemesi Ma‘rûz; Medîne-i Üsküdar’a tâbi‘ Bulgurlu karyesinde sâkin es-Seyyid Hüseyin b. Hüseyin nâm kimesne medîne-i mezbûrede mahfil-i bâbda meclis-i şer‘-i hatîrde Vartan v. Serkiz nâm zimmî muvâcehesinde merkūm Vartan zimmî târih-i i‘lâmdan bir sene mukaddem yedimden ve mâlımdan iştirâ ve kabz eylediği bir re’s doru bârgir semeninden yetmiş guruş hakkımın on guruşunu yedinden ahz ve altmış guruşu zimmetinde bâkī kalmağla taleb ederim deyü da‘vâ, ol dahi cevâbında zikr olunan bârgiri altmış guruşa iştirâ eylediğini ikrâr lâkin müdde‘î-i mezbûr kabzını mu‘terif olduğu meblağ-ı merkūm on guruşdan mâ‘adâ on guruşunu dahi yedine teslîm edip ancak kırk guruş deynim bâkī kalmış idi deyü ziyâde müdde‘âsını inkâr etmeğin merkūm Vartan zimmî ziyâde teslîmi ve müdde‘î-i mezbûr es-Seyyid Hüseyin ber-vech-i muharrer ziyâde müdde‘âsını her biri beyâna ba‘de’l-havâle merkūm Vartan zimmî mertebe-i ikrârı olan meblağ-ı merkūm kırk guruşun edâsıyla şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 15 min-Receb sene 1205