Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 429 Hüküm no: 610 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Foti v. Todori’nin mirasının taksiminde artaya çıkan anlaşmazlığın giderildiği Ma‘rûz; Medîne-i Üsküdar’a tâbi‘ Kuzguncuk karyesinde mütemekkin iken sekiz ay mukaddem hâlik olan Foti v. Todori nâm zimmînin verâseti zevce-i metrûkesi Tarsice bt. Rali nâm Nasrâniye ile sulbî kebîr oğlu Nikola ve sulbiye kebîre kızı Tamayi’ye münhasıra ve tashîh meselesi yirmi dört sehm i‘tibârıyla üç sehmi zevcesi merkūmeye ve on dört sehmi oğlu merkūma ve yedi sehmi kızı mersûmeye isâbeti tahakkukundan sonra merkūm Nikola zimmî meclis-i şer‘-i hatîrde şahsı mu‘arrefe anası merkūme Tarsice Nasrâniye muvâcehesinde babam hâlik-i merkūmun hîn-i helâkinde terekesini beynimizde taksim ederiz deyü terekesinden beşer bin guruş nakdini kabz ve sâir akār ve eşyâsını ve zimem-i müteferrikadan makbûzâtını taksîm etmeyip sâlifü’z-zikr makbûzu olan beş bin guruş nakd hâlik-i merkūmun vesâyâ-yı mu‘ayyenesi içün beş yüz guruşunu ifrâz edip bâkī kalan dört bin beş yüz guruşdan tashîh-i mezkûr üzere bana iki bin altı yüz yirmi beş guruş isâbet etmiş iken anam mersûme nakd-i merkūmdan ancak iki bin guruşunu bana teslîm ve altı yüz yirmi beş guruşu zimmetinde bâkī kalmağla nakd-i merkūmdan bâkī kalan altı yüz yirmi beş guruşu bana teslîm ve tereke-i sâireyi dahi taksîme tenbîh olunmak matlûbumdur deyü da‘vâ ve merkūme Tarsice Nasrâniye cevâbında fi’l-hakīka nakd-i merkūm dört bin beş yüz guruşu kabzını ve oğlu müdde‘î-i merkūma ancak iki bin guruş teslîmini ve tereke-i sâire dahi mevcûde olduğunu ikrâr etmeğin verese-i merkūmeden bint-i merkūme Tamayi Nasrâniye meclis-i şer‘de hâzıra olmamağla huzûruna ba‘de’t-tevkīf merkūme Tarsice Nasrâniye’nin ikrârı mûcebince makbûzu olan nakd-i merkūm dört bin beş yüz guruşdan alâ-mûcebi ikrârihi müdde‘î-i merkūmun hissesini tekmîl içün meblağ-ı merkūm altı yüz yirmi beş guruşu müdde‘î-i merkūma teslîmi iktizâ eylediği bi’l-iltimâs huzûr-ı âlîlerine i‘lâm olundu. Fî 15 min-Receb sene 1205