Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 431 Hüküm no: 612 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zorbalık ederek ahaliyi rahatsız eden Kalyoncu Çopur Mustafa ve adamlarının cezalandırılmaları Ma‘rûz; Kalyoncu neferâtından Hüseyin b. Hasan ve Hasan b. Mehmed ve Mehmed b. Bektaş ve birkaç nefer rüfekāsıyla târih-i i‘lâm gecesi medîne-i Üsküdar’da Selami mahallesinde ve Karakethudâ Bâğçesi nâm mahâlde Mıgırdıç v. Kalos ve Melkon v. Toros ve Abram v. Skender? ve Agop v. Manuk nâm zimmîlerin ellerinden şallarını ve keselerinden akçelerini ve biniş ve çevrelerini ahz ve firâr esnâsında Üsküdar Ustası kulları üzerlerine varıp neferât-ı merkūmûnu ahz ve huzûr-ı şer‘a ihzâr ve istintâk esnâsında fi’l-asl Üsküdar sükkânından Çopur demekle meşhûr Kalyoncu Mustafa nâm şakī bî-muhâbâ şutûm-ı galîza ederek meclis-i şer‘a gelip ben elli nefer kalyoncu üzerine zâbitim bunlar benim neferâtımdır sen niçün ahz ü ihzâr eyledin ben haklarından gelirim deyü usta-i mezbûrdan almak dâ‘iyesiyle münâkaşa üzere iken medîne-i mezbûre ahâlisinden yüz elli neferden mütecâviz ehl-i ırz ve mevsûkü’l-kelim, mazbûtü’l-esâmî Müslimîn meclis-i şer‘a gelip neferât-ı mezkûre ile merkūm Çopur Mustafa muvâcelerinde merkūmûn kendi hâllerinde olmayıp ba‘zı re‘âyâdan eşyâ ve mâllarını ahz ve tüccârdan cebren akçe mutâlebe eyledikleri ma‘lûmumuz olup neferât-ı merkūmenin bu misillü harekât-ı nâ-bercâları mücerred merkūm Çopur Mustafa’nın sevk ve ilkāsıyla musallatdır deyü muvâcehesinde sû-i hâllerini bi’ş-şöhret ve’t-tevâtür ihbâr etmeleriyle işbu takrîrimiz i‘lâm olunup bizler dahi lisânen ifâde ederiz deyü istirhâm ve niyâz etmeleriyle siyâneten-li’l-ibâd ve temînen-li’l-bilâd ve merkūm Çopur Mustafa ile neferât-ı merkūmenin şer ve mazarratlarını ibâdullâh üzerinden def‘ ve haklarında iktizâ eden tedîbleri re’y-i âlîlerine menût olduğu ma‘lûm-ı devletleri buyuruldukda emr ü fermân hazret-i veliyyü’l-emrindir. Fî 7 min-Ş sene 1205