Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 433 Hüküm no: 616 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Avram v. Sabatay’ın borcunu ödemesi Ma‘rûz; Mahmiye-i İslâmbol’da Zindankapısı kurbünde mütemekkin Manol v. Mihal nâm zimmî medîne-i Üsküdar’da meclis-i şer‘-i hatîrde Avram v. Sabatay nâm Yahûdî muvâcehesinde merkūm Avram Yahûdî bundan akdem yedimden iştirâ ve kabz eylediği vezn ve fiyâtı beynimizde ma‘lûm penbe ipliği semeninden ba‘de-külli’l-hesâb on dokuz guruş on dokuz para hakkım zimmetinde bâkī kalıp hatta târih-i i‘lâm günü ikrâr dahi etmekle meblağ-ı bâkī-i merkūm on dokuz guruş on dokuz parayı hâlâ taleb ederim deyü da‘vâ eyledikde mesfûr Avram Yahûdî cevâbında müdde‘î-i mersûma cihet-i mezkûreden ba‘de-külli’l-hesâb ancak dokuz guruş on üç para deyni olduğunu ikrâr, ziyâdeyi inkâr etmekle müdde‘î-i merkūm Manol zimmî merkūm Avram Yahûdî’nin ikrâr-ı meşrûhunu Manol v. Simyon ve Anderya v. Simyon nâm zimmîler şehâdetleriyle vech-i şer‘î üzere isbât etmeğin mûcebiyle meblağ-ı bâkī-i merkūm on dokuz guruş ve on dokuz parayı müdde‘î-i merkūma edâ ve teslîme merkūm Avram Yahûdî’ye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 23 min-C sene 1205