Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 433 Hüküm no: 617 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mahmud’un ölümüne sebep olduğu Seyyid Mehmed için diyet ödemesi Ma‘rûz; Medîne-i Üsküdar’da Kefçe mahallesinde sâkin, bundan akdem cerîhan fevt olan es-Seyyid Mehmed Ali b. es-Seyyid Mehmed b. İbrahim’in verâseti babası mezbûr es-Seyyid Mehmed ile anası Safiye bt. Abdullah’a inhisârı lede’ş-şer‘i’l-enver zâhir oldukdan sonra sâhib-i arzuhâl mezbûr es-Seyyid Mehmed ile zâtı mu‘arrefe mezbûre Safiye Çarşamba günü Dîvân-ı âlî’de ma‘kūd meclis-i şer‘-i hatîrde arzuhâlde ismi mezkûr Hüseyin b. Mahmud mahzarında mezbûr Hüseyin târih-i i‘lâmdan kırk yedi gün mukaddem mahalle-i mezbûrede Doğancılar Meydanı nâm mahâlde tarîk-i âmda bi-gayrı hakkın amden taş ile oğlumuz mezbûr es-Seyyid Mehmed Ali’yi sağ kaşı ucunda gözüne karîb mahâlline darb ve cerh eyledikden sonra mezbûr Hüseyin mahalle-i mezbûrede kâin berber dükkânına gelip huzzâr-ı meclisin ba‘zısı tarafından niçün darb ve cerh eyledin deyü suâl olundukda ber-vech-i muharrer darb ve cerh eyledim ve ölümü dahi benim yedimdedir deyü ikrâr ü i‘tirâf ve sekiz gün mürûrunda cerh-i mezkûrdan müte’essiren fevt olmağla mûcib-i şer‘îsini taleb ederiz deyü da‘vâ ve mezbûr Hüseyin cevâbında târih-i mezkûrda müteveffâ-yı mezbûr ile top oynar iken benim arkama binip ol anda sar‘a illeti tutup yere düşüp başı taşa isâbet etmekle uzv-ı ma‘hûd-ı mezkûrundan mecrûh olmuş idi deyip kendinin darb ve cerhini ve ikrârını bi’l-külliye inkâr etmeğin müdde‘iyân-ı mezbûrân mezbûr Hüseyin’in ikrâr-ı meşrûhunu lede’t-tezkiye adâletleri zâhir olan Eyüb b. İbrahim ve Hüseyin b. Mehmed nâm kimesneler şehâdetleriyle Dîvân-ı âlî’de muvâcehesinde vech-i şer‘î üzere isbât etmeğin mûcebiyle mezbûr Hüseyin’den şer‘an diyet-i kâmile iktizâ eylediği mübâşiri Kapıkethudâsı Mehmed kulları iltimâsıyla huzûr-ı âlîlerine i‘lâm olundu. Fî 9 min-Ş sene 1205