Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 451 Hüküm no: 657 Orijinal metin no: [55a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolluk Ağası Hasan Ağa’nın silahlı gezen iki kalyoncuyu yakalatması sırasında arbede olduğu Ma‘rûz; Medîne-i Üsküdar’a memûr Kolluk Ağası Hasan Ağa kulları meclis-i şer‘a gelip şöyle takrîr-i kelâm eder ki hîn-i memûriyetimde kolluk neferâtından mâ‘adâ silâh ile geşt ü güzâr olunmamak üzere nizâma rabt edip işbu târih-i i‘lâm günü ba‘de’l-asr medîne-i mezbûrede Selami nâm mahâlde kol gezer iken İskele-i kebîr kurbünde Hasan Kapudan neferâtından Kandiyeli Osman b. Ömer ve Yakub Kapudan neferâtından Arab Ali b. İbrahim nâm kimesneler hilâf-ı tenbîh müsellah geşt ü güzâr eylediklerini tarafıma haber verdiklerinde gelip mezbûrları ahz murâd eylediğimde mezbûr Osman neferâtımdan Ali b. Ahmed’i kaşı üzerinden yatağan bıçağı ile darb ve cerh edip ve neferâtım dahi ahzlarına ikdâm esnâsında mezbûr Osman’ı dahi sağ eli parmaklarıyla sol kolundan ve arkasından mecrûh olmuşdur deyü huzûr-ı şer‘a ihzâr eyledikde mecrûh-ı mezbûr Osman’dan cârihi suâl olundukda ben kimesneyi darb etmedim ol esnâda beni kimler darb etdiği ma‘lûmum değildir deyü cevâb etmekle ber-minvâl-i muharrer keşf ve mu‘âyene olunduğu huzûr-ı âlîlerine i‘lâm olundu. Fî 25 min-Ş sene 1205