Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 452 Hüküm no: 658 Orijinal metin no: [55a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başıbüyüklü köyü ile Bakkallar köyü ahali ve reayaları arasında Hamza Çelebi Çiftliği ismiyle bilinen mer‘a anlaşmazlığının giderildiği Ma‘rûz; Sâdır olan fermân-ı âlîlerine imtisâlen kıbel-i şer‘-i şerîfden meb‘ûs Mehmed Salih Efendi dâ‘îleri Medîne-i Üsküdar’a muzâfe Başıbüyüklü karyesi arâzisi ittisâlinde vâki‘ zikri âtî münâza‘un-fîhâ olan mer‘aya varıp mazbûtü’l-esâmî huzûrlarında akd-i meclis-i şer‘-i şerîf etdikde arzuhâlde mezkûru’l-esâmî karye-i mezbûre ahâlilerinden Mehmed Beşe b. Mustafa ve Osman b. Mustafa ve es-Seyyid Hasan b. Süleyman ve Abdullah b. Halil ve es-Seyyid Mehmed b. Salih ve Osman Efendi b. İbrahim ve Hasan b. Abdullah ve Ali Usta b. Ali ve diğer Hasan b. Abdi ve Mehmed b. Ahmed ve diğer Mehmed b. Ahmed ve Feyzullah b. Abdullah ve Halil b. İbrahim ve Musa b. Mehmed nâm kimesneler meclis-i ma‘kūd-ı mezkûrda karye-i mezbûre civârında Hamza Çelebi Çiftliği demekle ma‘rûf Bakkāllar karyesi mütemekkinlerinden arzuhâl eden Nikola v. Apostol ve Zaharya v. Nikola v. Yani ve Dimitri v. Nikola ve İstati v. Gara ve Riga v. Yorgaki ve Kostanti v. Yorgaki ve Yani v. Nikola ve diğer Zaharya v. Yorgaki ve Kostanti v. Yani ve Yorgi v. Dimitri ve Tanaş v. Kostanti nâm zimmîler ile terâfu‘larında sâlifü’z-zikr Hamza Çelebi Çiftliği arâzisi bizim karyemiz arâzisine muttasıl olmağla kadîmden karyemiz Başıbüyüklü karyesi hudûdu işbu mu‘âyene olunan Adımkaya? ve kebîr taş ve çamlar olup bu hudûdun dâhilinde olan mer‘a kadîmden bizim karyemiz mer‘asından iken zimmîyyûn-ı merkūmûn sâlifü’z-zikr karyemiz hudûdunu tecâvüz ve dâhil-i hudûd-ı mezkûremizde olan mer‘amızı bizim Hamza Çelebi Çiftliği karyemiz hudûdu dâhilindedir deyü fuzûlî vaz‘-ı yed-i intifâ‘ ve zabt ü tasarruf etmeleriyle zimmîyyûn-ı merkūmûnun mer‘a-yı mahdûd-ı mezkûrdan keff-i yed etmeleriyle [etmeleri] matlûbumuzdur deyü sâhib-i arz tarafından ve mültezimi el-Hâc Mehmed Emin Ağa hâzır olduğu hâlde da‘vâ eylediklerinde zimmîyyûn-ı merkūmûn dahi cevâblarında hâlâ yedimizde mülkümüz ve taht-ı tasarrufumuzda olan Hamza Çelebi Çiftliği demekle ma‘rûf çiftlik mukaddemâ Yusuf Ağa nâm kimesnenin mülkü ve taht-ı tasarrufunda iken yirmi yedi sene mukaddem işbu yedimizde olan bin yüz yetmiş sekiz senesi Şa‘bânı’nın on dördüncü günü târihiyle müverraha bir kıt‘a hüccet nâtıka olduğu üzere merkūm Yusuf Ağa çiftlik-i mezkûrun emlâkini bizlere bey‘ u teslîm ve arâzisini dahi senevî altı yüz akçe mukāta‘a ile çiftlik-i mezkûrdan olmak üzere bâ-ma‘rifet-i sâhib-i arz bize ferâğ ve tefvîz eyledikde münâza‘un-fîhâ olan mer‘a-yı mahdûdu kendi hakk-ı müfevvezi olmak üzere bâ-ma‘rifet-i sâhib-i arz mahâll-i münâza‘un-fîhâyı dahi bizlere bedel-i ma‘lûm mukābelesinde tefvîz edip ol-vechile yirmi yedi sene bizler ve elli dokuz sene fâriğ-i mezbûr Yusuf Ağa ki cem‘an seksen altı sene müddi‘iyûn-ı merkūmûn muvâcehelerinde bizler dahi bilâ-nizâ‘ mahâll-i münâza‘un-fîhâyı mer‘amız olmak üzere tasarruf ve intifâ‘ımız meşhûr ve mütevâtirdir deyü mer‘a-yı mahdûd-ı mezkûru müdde‘iyûn-ı merkūmûnun müstakıllen mer‘alarından olduğunu inkâr etmeleriyle Başıbüyüklü karyesi ahâlisi olan müdde‘iyûn-ı merkūmûn dahi zimmîyyûn-ı mersûmûnun yirmi yedi sene zabt ve tasarruflarını ve kendilerinin ol müddetde sükûtlarını ikrâr edip lâkin fî-mâ ba‘d zabt ve tasarruflarına rızâmız yokdur müstakil mer‘amızdır deyü müdde‘âlarına şâhid olmak üzere ikāmet eyledikleri kurb ve civârlarında olan dört aded kurâ ahâlilerinden cerîdede mazbûtü’l-esâmî kırk iki nefer mukaddem ve mu’ahhar bî-garaz Müslimîn kimesneler meclis-i ma‘kūd-ı mezkûra hâzırûn olup istişhâd olunduklarında işbu mu‘âyene olan Adımkaya? ve kebîr taş ve çamlar hudûduyla mahdûd olan mahall eğerçe mer‘a-yı kadîmdir lâkin Başıbüyüklü karyesi ile Hamza Çelebi Çiftliği ahâlileri kırk seneden mütecâviz mahâll-i mezkûrun otundan ve suyundan bi’l-ma‘iyye kadîmden beri intifâ‘ edegelmişlerdir deyü bi’ş-şöhret ve’t-tevâtür alâ-tarîki’ş-şehâde cümle muvâcehesinde haber vermeleriyle mûcebiyle münâza‘un-fîh olan mer‘a-yı mahdûd-ı mezkûr kadîmîsi üzere Başıbüyüklü karyesi ahâlileri ile Hamza Çelebi Çiftliği karyesi ahâlileri bi’l-ma‘iyye iştirâken tasarruf eyleyip her biri mer‘a-yı mahdûd-ı merkūmun gerek otundan ve gerek suyundan kadîmîsi üzere intifâ‘ eyleyip tarafeynden her biri âharın hayvanlarını def‘ ü men‘ etmemek üzere tenbîh olunduğu ba‘de’l-inhâ huzûr-ı âlîlerine i‘lâm olundu. Fî 3 min-N sene 1205