Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 456 Hüküm no: 664 Orijinal metin no: [55b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un komşusu Mustafa aleyhine açtığı davada haksız bulunduğu Ma‘rûz; Medîne-i Üsküdar’da Tenbel el-Hâc Mehmed mahallesinde sâkin mu‘arrefetü’z-zât Hadice bt. Mustafa nâm hatun medîne-i mezbûrede mahfil-i bâbda meclis-i şer‘-i hatîrde Mustafa b. Ahmed nâm kimesne mahzarında mahalle-i mezbûrede vâki‘ benim bir bâb menzilim ile mezbûr Mustafa’nın menzili beyninde iki üç arşun mikdârı bir kıt‘a seyl deresiyle fâsıla olup benim mukaddemâ menzilimin kenîfi mârrü’z-zikr seyl deresi üzerine binâ ve inşâ olundukda bi-gayrı hakkın fuzûlî kenîf-i merkūmun direk uçları mezbûr Mustafa’nın menzili duvarına vaz‘ olunmuş olup bu hâl üzere intifâ‘ım mütehakkık iken mezbûr Mustafa bu esnâda kendi menzilini hedm ve kenîfimin direklerini yerinden nez‘ ve menzil-i merkūmunu müceddeden binâ ve inşâ etmekle zikr olunan kenîfimin direklerini mezbûr Mustafa’nın menzili duvarına kemâ-fi’s-sâbık bi-gayrı hakkın fuzûlî vaz‘a mezbûr Mustafa’ya tenbîh olunmak matlûbumdur deyü müdde‘iye-i mezbûre Hadice Hatun’un ber-vech-i muharrer tasaddî eylediği da‘vâ-yı gayr-ı meşrû‘asına iltifât olunmadığı bi’l-iltimâs huzûr-ı âlîlerine i‘lâm olundu. Fî 24 min-N sene 1205