Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 431 Hüküm no: 448 Orijinal metin no: [103b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saltana ile münazaalı bağı Todori’den satın alan Yahûdi Yuda’nın bağı iade edip parasını geri aldığı Ma‘rûz Sâhibe-i arzuhâl Saltana nâm Nasrâniye meclis-i şer‘de derûn-ı arzuhâlde mezkûrü’l-ism Yuda nâm Yahûdi muvâcehesinde mahrûse-i Galata’ya tâbi‘ İstinye nâhiyesi karyelerinden Yeniköy nâm karye hudûdu dâhilinde vâki‘ ma‘lûmü’l-hudûd bir kıt‘a bağ babamdan müntakil mülk-i mevrûsum iken merkūm Yuda bi-gayr-ı hakkın zabt etmekle kasr-ı yedine tenbîh olunmak matlûbumdur deyü da‘vâ eyledikde ol dahi mârru’z-zikr bağ-ı mahdûdu bin yüz kırk iki senesi Receb-i şerîfinin onuncu günü gāib ani’l-meclis Todori nâm zimmî kendi mülkü olmak üzere Galata’da nâibü’ş-şer‘ olan Abdullah Efendi huzûrunda yüz elli guruşa bi-tarîkı’l-istiğlâl bana bey‘ ve teslîm ben dahi ber-vech-i muharrer iştirâ ve tesellüm etmişidim lâkin fi’l-hakīka bağ-ı mezbûr müdde‘iyye-i mezbûre ile gāib-i mezbûr beyninde münâza‘un-fih olduğuna vâkıf olmamla târih-i i‘lâmdan dört gün mukaddem yine gāib-i mezbûru ahz ve Galata nâibi mûmâ-ileyh Abdullah Efendi huzûrunda kendiye medfû‘um olan meblağ-ı mezbûr yüz elli guruşu taleb ve ba‘de’l-hükm bağ-ı mezbûru fek edip bağ-ı mezbûrda kat‘â alâka ve medhalim yokdur deyü takrîr-i meşrûhuna mutâbık nâib-i mûmâ-ileyhin hat ve hatemini hâvî bir kıt‘a hüccet-i şer‘iyye dahi ibrâz ve bağ-ı mezbûrda alâka ve medhali olmadığını ikrâr u i‘tirâf eylediği huzûr-ı âlîlerine i‘lâm olundu. Fî 24 Safer sene [1]143.