Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 475 Hüküm no: 701 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehzade Camii mütevellisi Yusuf Ağa ile Yahudi Yuda arasındaki alacak verecek davasında sulh oldukları Ma‘rûz; Mahmiye-i İslâmbol’da Hasırcılar kurbünde mütemekkin Yuda v. Yako nâm Yahûdî medîne-i Üsküdar’da meclis-i şer‘-i hatîrde arzuhâlde ismi mezkûr Yusuf Ağa b. Hasan mahzarında mezbûr Yusuf Ağa bin iki yüz bir senesi mahmiye-i mezkûrede vâki‘ Şehzâde Câmi‘-i şerîfi’nin mütevellîsi olmağla vakıf içün yedimden iştirâ ve kabz eylediği kandil ve şamandıra semenlerinden zimmetinde hakkım olan otuz üç guruşun dört guruşunu yedinden ahz, bâkī yirmi dokuz guruşu taleb ederim deyü eylediği da‘vâsından bâ-tavassut-ı muslihîn on beş guruş bedel-i makbûza mezbûr Yusuf Ağa ile sulh olup ziyâde müdde‘âsına ve bi’l-cümle husûs-ı mezkûra müte‘allika âmme-i de‘âvîden mezbûr Yusuf Ağa’nın zimmetini ibrâ ve ıskāt ol dahi medfû‘u olan on beş guruşa müte‘allika âmme-i de‘âvîden merkūm Yuda Yahûdî’nin zimmetini ibrâ ve ıskāt ve her biri âharın ibrâsını kabûl ve bu vechile kat‘-ı münâza‘a eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 7 min-Za sene 1205