Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 474 Hüküm no: 700 Orijinal metin no: [58a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Mihal’den kalan mîrasın vârisleri arasında taksiminin yapılarak vârisler arasındaki satışın gerçekleştirildiği Ma‘rûz; Medîne-i Üsküdar’a muzâfe Gekbûze nâhiyesine tâbi‘ Darıca karyesi mütemekkinlerinden iken bundan akdem hâlik olan Yamandi v. Hırsogono v. Mihal zimmînin verâseti zevcesi Maruka bt. Yani ile sulbî kebîr oğulları Papa Hırisontoz ve Andon ve Zorzi ile kebîre kızı Mariya’ya münhasıra ve tashih meselesi bi-hükmi’l-ferâiz sekiz sehm i‘tibârıyla bir sehmi zevce-i mezbûreye ve ikişer sehmden altı sehmi oğulları merkūmûna ve bir sehmi kızı mezbûreye isâbeti tahakkukundan sonra merkūm Papa Hırisontoz zimmî kendi nefsinden asâleten ve merkūmûn Maruka ve Andon ve Rozi [Zorzi] ve Mariya taraflarından vekîl-i müseccelleri olmağla vekâleten meclis-i şer‘-i hatîrde kendi nefsinden asâleten ve karındaşı İstefani zimmî tarafından vekîl-i müsecceli olan Yorgi nâm zimmî muvâcehesinde karye-i mezbûrede vâki‘ ma‘lûmü’l-hudûd bir kıt‘a bağ hâlik-i merkūmun ile’l-helâk yedinde mülkü ve ba‘de-helâkihî bize mevrûs olmağla ben asâleten ve vekâleten bağ-ı mezkûru bâ-hüccet-i şer‘iye merkūmân İstefan[i] ve Yorgi zimmîlere elli guruşa bey‘ u temlik onlar dahi ber-vech-i muharrer iştirâ ve temellük ve kabûl edip semen-i merkūmun altı guruşu yedinden ahz ve bâkī kırk dört guruşu zimmetinde bâkī kalmağla taleb ederim deyü bi’l-asâle ve bi’l-vekâle ba‘de’d-da‘vâ ve’l-istintâk ve’l-ikrâr mûcebiyle meblağ-ı bâkī-i merkūm kırk dört guruşun edâsıyla vekîl-i merkūm Yorgi zimmî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 28 min-L sene 1205