Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 476 Hüküm no: 703 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kethuda Hasan b. Ali’nin hizmetini gördüğü Halil Paşazade Mustafa Bey’den alacaklı olduğu yolundaki iddiasını ispatlayamadığı Ma‘rûz; Medîne-i Üsküdar’a muzâfe Yoros nâhiyesine tâbi‘ Kurddoğmuş karyesinde vâki‘ Sefer Usta Çiftliği’nin kethudâsı Hasan b. Ali nâm kimesne medîne-i mezbûrede meclis-i şer‘-i hatîrde çiftlik-i mezkûr mutasarrıfı Silahşor-ı hazret-i şehriyârî Halil Paşazâde Mustafa Bey tarafından ber-vech-i âtî terâfu‘a vekîl olduğu el-Hâc Mustafa Efendi b. Mehmed ve İsmail Ağa b. Mehmed nâm kimesneler şehâdetleriyle sâbit olan Mustafa Ağa b. el-Hâc Mehmed nâm kimesne mahzarında müvekkil-i mezbûrun çiftlik-i mezkûrunda senevî yüz guruş ücret kavliyle yetmiş ay kethudâlık hizmetinde olup şühûr-ı mezkûrede müstehakk olduğum dört yüz seksen iki guruş ücretim ile müvekkil-i mezbûrun emriyle gerek çoban ve sâir hademesi ücreti ve gerek hayvanâtının me’külâtlarına ve sâir mesârif-i müteferrikalarına masrûfum olan üç bin dört yüz yetmiş bir guruş ki cem‘an üç bin dokuz yüz elli üç guruş hakkımın bin iki yüz kırk sekiz guruşunu müvekkil-i mezbûr Mustafa Bey’in emriyle âhara bey‘ eylediğim gerek leben ve gerek hayvanât semenlerinden ahz ü kabzımdan sonra iki bin yedi yüz beş guruş zimmetinde bâkī kalmağla taleb ederim deyü da‘vâ ve vekîl-i mezbûr cevâbında fi’l-hakīka müdde‘î-i mezbûr müvekkilim mezbûrun çiftliğinde kethudâ olup lâkin hizmet-i mezkûresi ancak otuz dört ay olup ziyâdeyi inkârından mâ‘adâ târih-i i‘lâmdan beş buçuk ay mukaddem müvekkil-i mezbûr Mustafa Bey ile müdde‘î-i mezbûr cemî‘ ahz ü i‘tâsının hesâb-ı sahîh ile hesâblarını rü’yet ve müdde‘î-i mezbûr âhara bey‘ eylediği leben ve gerek hayvanât semenlerinden kabzını mu‘terif olduğu bin iki yüz kırk sekiz guruşdan ücret-i mezkûresi ile masrûfâtı fürû-nihâde olundukda sahhu’l-bâkī müvekkilimin müdde‘î-i mezbûr zimmetinde iki yüz guruş hakkı zuhûr etmiş iken müvekkilim mezbûr Mustafa Bey meblağ-ı merkūm iki yüz guruş ile müdde‘î-i mezbûrdan matlûbu olan yetmiş yedi guruş kıymetli bir kazgan da‘vâsından meccânen fâriğ ve zimmetini ibrâ eyledikde ol dahi müvekkil-i mezbûr Mustafa Bey’in zimmetinde aslâ hakkım bâkī kalmadı deyü huzûr-ı Müslimînde ikrâr etmiş idi deyü ba‘de’d-def‘ ve’l-inkâr vekîl-i mezbûr def‘-i mezkûrunu mezbûr el-Hâc Mustafa Efendi b. Mehmed ve Mehmed Emin [b.] Ömer nâm kimesneler şehâdetleriyle vech-i şer‘î üzere müdde‘î-i mezbûr muvâcehesinde isbât etmeğin mûcebiyle müdde‘î-i mezbûr da‘vâ-yı mezkûresiyle müvekkil-i mezbûr Mustafa Bey’e bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 29 min-L sene 1205