Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 484 Hüküm no: 719 Orijinal metin no: [59b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. İmam Hasan’ın Receb Ağa Çiftliği’ne ait korudan ağaç kesmemeğe söz verdiği Ma‘rûz; Medîne-i Üsküdar hâricinde vâki‘ Receb Ağa Çiftliği demekle meşhûr çiftliğin mutasarrıfı hâcegân-ı Dîvân-ı hümâyûn’dan Mehmed Efendi b. Mehmed tarafından vech-i âtî üzere vekîl-i müsecceli Mehmed Ağa b. Hüseyin medîne-i mezbûrede mahfil-i bâbda meclis-i şer‘-i hatîrde medîne-i mezbûreye tâbi‘ Sarıgâzi karyesi sükkânından Hasan b. İmâm Hasan mahzarında mezbûr Hasan çiftlik-i mezkûr korusuna bi-gayrı hakkın duhûl ve beş araba mikdârı hatabını kat‘ ve âhar mahalle nakl ve istihlâk etmekle tazmîn olunmak bi’l-vekâle murâdımdır deyü eylediği da‘vâsından hatab kat‘ etmemek üzere ta‘ahhüd ve mezbûr Hasan’ın hilâf-ı ta‘ahhüd hareket etmemesine karye-i mezbûre ahâlisinden diğer Hasan b. Mehmed ve İbrahim b. Hasan ve Ömer b. Mehmed ve Bekir b. Mustafa ve Eyüb b. Ahmed ve es-Seyyid Mustafa b. Mehmed nâm kimesnelerden her biri tekeffül eylediklerinde vekîl-i mezbûr dahi ber-vech-i muharrer râzı ve kabûl ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 29 min-Şevvâl sene 1205