Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 509 Hüküm no: 771 Orijinal metin no: [63a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Tahir Efendi’nin borcunu ödemesi Ma‘rûz; Medîne-i Üsküdar’da İhsâniye mahallesinde sâkine mu‘arrefetü’z-zât Âişe bt. Mehmed nâm hatun medîne-i mezbûrede mahfil-i bâbda meclis-i şer‘-i hatîrde es-Seyyid Mehmed Tâhir Efendi b. Mehmed Emin nâm kimesne mahzarında mahalle-i mezbûrede vâki‘ ma‘lûmü’l-müştemilât bir bâb vakıf menzilin nısfı benim ve nısf-ı âharı mezbûr es-Seyyid Mehmed Tâhir Efendi’nin tasarrufunda olup beher şehr dörder guruş ücret kavliyle müstecirim olmağla nısf menzil icâresinden on altı ayda zimmetinde müctemi‘a olan altmış dört guruşun on beş guruşunu ahz bâkī kırk beş guruşu taleb ederim deyü da‘vâ, mezbûr es-Seyyid Mehmed Tâhir Efendi cevâbında cihet-i mezkûreden bâkī müdde‘iye-i mezbûre[ye] yirmi yedi guruş deyni olduğunu ikrâr ziyâde on sekiz guruşu inkâr etmeğin müdde‘iye-i mezbûre ziyâde müdde‘âsını beyândan izhâr-ı acz birle bi’t-taleb mezbûr es-Seyyid Mehmed Tâhir Efendi gıbbe’t-tahlîfi’ş-şer‘î mûcebiyle müdde‘iye-i mezbûre ziyâde müdde‘âsıyla mu‘ârazadan ba‘de’l-men‘ mertebe-i ikrârı olan yirmi yedi guruşun edâsıyla mezbûr es-Seyyid Mehmed Tâhir Efendi ilzâm olunduğu bi’l-iltimâs huzûr-ı âlîlerine i‘lâm olundu. Fî 9 min-Za sene 1205