Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 508 Hüküm no: 770 Orijinal metin no: [63a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed’in boşandığı eşi Fatma’ya olan nafaka borcunu ödemesi Ma‘rûz; Mahmiye-i İslâmbol’da Kocamustafapaşa’da sâkine mu‘arrefetü’z-zât Fatıma bt. Abdullah nâm hatun medîne-i Üsküdar’da mahfil-i bâbda meclis-i şer‘-i hatîrde zevc-i sâbıkı es-Seyyid Mehmed b. Ömer nâm kimesne mahzarında zevc-i sâbıkım mezbûr es-Seyyid Mehmed’in firâşından hâsıla ve benden mütevellide sulbiye sagīre kızım Şerife Ümmügülsüm’e beher şehr üçer guruş bâ-hüccet-i şer‘iye babası mezbûr üzerine nafaka farz ve takdîr olunmağla nafaka-i mefrûza-i müstedânesinden on iki ayda zimmetinde müctemi‘a olan otuz altı guruşun sekiz guruşunu ahz ve yirmi sekiz guruşu zimmetinde bâkī kalmağla taleb ederim deyü da‘vâ ve mezbûr es-Seyyid Mehmed cevâbında müdde‘iye-i mezbûreye cihet-i mezkûreden bâkī ol-mikdâr deyni olduğunu ikrâr lâkin kabzını mu‘terif olduğu sekiz guruşdan mâ‘adâ dokuz guruş dahi teslîm edip ancak on dokuz guruş deynim bâkī kalmış idi deyü ba‘de’d-def‘ ve’l-inkâr dâfi‘-i mezbûr es-Seyyid Mehmed def‘-i mezkûrunu udûlden Mehmed b. Hüseyin ve Halil b. Mehmed nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle müdde‘iye-i mezbûre ziyâde müdde‘âsıyla bî-vech mu‘ârazadan ba‘de’l-men‘ mertebe-i ikrârı olan on dokuz guruşun edâsıyla mezbûr es-Seyyid Mehmed şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 15 min-Za sene 1205