|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 254 Hüküm no: 355 Orijinal metin no: [52a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Vefât eden Ahmed b. Hüseyin’in muhallefatından vârislerden Hasan’ın alacağı kalmadığı
Hâssa bostancılarından olup bundan akdem vefât eden Ahmed b. Hüseyin’in verâseti zevcesi Fâtıma bt. Hüseyin nâm hatun [ve] karındaşı Hasan nâm kimesne mahzarında olduğu şer‘an müte‘ayyen oldukdan sonra mezbûr Hasan mahfil-i kazâda müteveffâ-i mezbûrun muhallefâtına vâzı‘u’l-yed olup hâlâ bostancıbaşı olan iftihârü’l-emâcid ve’l-ekârim câmi‘ü’l-mehâmid ve’l-mekârim Hasan Ağa -zîde kadruhu- tarafından ikrâr-ı âti’l-beyânı tasdîka vekîl-i sâbitü’l-vekâle olan işbu bâ‘isü’l-kitâb Osman Bey b. Ömer mahzarında ikrâr-ı tâm ve takrîr-i kelâm edip mûrisim müteveffâ-i mezbûrun muhallefâtından müvekkil-i müşârun-ileyhin makbûzu olup üç rub‘ hisse-i şer‘iyyem mukābelesinde bana isâbet eden yüz kırk bin akçe hakkımı zikrolunan yüz kırk akçe hakkımdan yedinde bir akçe ve bir habbe hakkım bakī kalmadı, müteveffâ-i mezbûrun ka[l]îl ü kesîr ve celîl ü hakīr ism-i mâl ıtlâk olunur muhallefâtına müte‘allik da‘vâda müvekkil-i müşârun-ileyhin zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim dedikde mukırr-ı mezbûr Hasan’ı ikrâr-ı meşrûhunda vekîl-i ...?.
Tahrîren fi’l-yevmi’t-tâsi‘ aşer min-Cemâziyelâhire li-sene erba‘a ve sittin ve elf.
Şuhûdü’l-hâl: Hüseyin Ağa -zîde kadrühû-, Mustafa Usta b. Mehmed, İsmail Bey b. Hüseyin peremeci, el-Hâc Mehmed Bey b. ( ), Ömer b. Mustafa, el-Hâc Mehmed, Pîrî Beşe b. Hüseyin ve gayruhum.
|