.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 254
Hüküm no: 354
Orijinal metin no: [52a-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


el-Hâc Mehmed b. Ali’nin borcu olduğu

Tüccâr-ı zevi’l-ihtirâmdan işbu bâ‘isü’l-kitâb es-Seyyid Mehmed Çelebi b. es-Seyyid Mehmed el-Mağribî mahfil-i kazâda el-Hâc Mehmed b. Ali mahzarında üzerine da‘vâ edip mezbûr el-Hâc Mehmed zimmetinde yedimden müşterâ ve makbûz olup aded[i] beynimizde ma‘lûm fes bahâsından dört yüz yetmiş yedi riyâlî guruş hakkım olup meblağ-ı mezbûrdan beş guruşunu yedinden ahz u kabz edip bâkī zimmetinde dört yüz yetmiş iki guruş hakkım kalmışdır, suâl olunup alıverilmesi matlûbumdur dedikde gıbbe’s-suâl mezbûr el-Hâc Mehmed cevâbında müdde‘î-i mezbûrun benim zimmetimde ancak dört yüz altmış guruş hakkı olup meblağ-ı mezbûrdan beş guruşunu kendüye def‘ ve teslîm edip bâkī zimmetimde dört yüz elli beş riyâl guruş hakkı kalmışdır, el-ân edâsı lâzım ve kazâsı vâcib deynimdir deyü bi-tav‘ihi ikrâr u i‘tirâf etmeğin müdde‘î-i mezbûr ikrârı mûcebince edasına tenbîh olunmak iltimâs etmeğin mezbûr el-Hâc Mehmed ikrâr mûcebince dört yüz elli riyâlî guruşu müdde‘î-i mezbûra edâ etmek üzere ilzâm olunup mâ-hüve’l-vâki‘ bi’t-taleb ketb olundu.

Tahrîren fi’l-yevmi’s-sâmin aşer min-Cemâziyelâhire li-sene erba‘a ve sittin ve elf.

Şuhûdü’l-hâl: Eş-şeyh Ali b. Selame, İbrahim Çelebi b. Davud, Pîrî Beşe b. Hüseyin, Ali Beşe b. Abdullah çukadâr ve gayruhum.