Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 514 Hüküm no: 782 Orijinal metin no: [64a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kerime Hanım’ın Bakkal Nikola’ya olan borcunu erteleyerek taksitle ödemeyi kabul ettiği Ma‘rûz; Medîne-i Üsküdar’da Büyükkolluk kurbünde mütemekkin Bakkāl Nikola v. Manol nâm zimmî medîne-i mezbûrede mahfil-i bâbda meclis-i şer‘-i hatîrde mu‘arrefetü’z-zât Kerime bt. Mustafa nâm hatun mahzarında mezbûre Kerîme Hatun bundan akdem yedimden ve mâlımdan iştirâ ve kabz eylediği vezn ve fiyâtı beynimizde ma‘lûm ecnâs-ı zehâ’ir semeninden seksen dört buçuk guruş hakkımın on guruşunu yedinden ahz ve bâkī yetmiş dört buçuk guruşu zimmetinde kalmağla taleb ederim deyü da‘vâ eyledikde ol dahi ikrâr ü i‘tirâf edip lâkin meblağ-ı bâkī-i merkūmu hâlâ edâya iktidârı olmayıp tecîle tâlibe olmağla müdde‘î-i merkūm dahi mezbûre Kerime Hatun’u târih-i i‘lâmdan altmış bir gün tamamında kendiye edâ etmek üzere tecîl eylediğinde ol dahi ber-vech-i muharrer müeccelen edâya ta‘ahhüd edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 5 min-Z sene 1205