Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 436 Hüküm no: 458 Orijinal metin no: [104b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Kostantin’in Komyanos üzerine açtığı davayı delillendiremediği Ma‘rûz. Mehmed Çavuş kulları mübâşeretiyle Mahkeme-i Bâb’a ihzâr olunan Komyanos zimmîden hasmı sâhib-i arzuhâl Yanaki v. Kostantin nâm zimmî meclis-i şer‘de mezbûr Komyanos zimmî târih-i i‘lâmdan on dört ay mukaddem işbu yedimde olan temessükü nâtık olduğu üzere cihet-i karz-ı şer‘îden bin yüz guruş hakkım olmağla meblağ-ı mezbûru taleb ederim deyü ba‘de’d-da‘vâ ve’l-inkâr müdde‘î-i mezbûrdan müdde‘âsına beyyine taleb olundukda ityân-ı beyyine için istimhâl etmekle mehl-i şer‘î ile ba‘de’l-imhâl müddet-i mehl münkaziye ve ityân-ı beyyine etmeyip tahlîfe dahi taleb olmamağla mezbûr Yanaki bilâ-beyyine bî-vech mu‘ârazadan men‘ olundukdan sonra mezbûr Yanaki’nin bu makūle tezvîrât ile dâimâ ibâdullâhı bi-gayr-ı hakkın rencîde ve ta‘cîz âdet-i müstemirresidir deyü Müslim ve ehl-i zimmetden dokuz nefer kimesnelerden her biri haber verdikleri bi’l-iltimâs huzûr-ı âlîlerine i‘lâm olundu. Fî 27 Safer sene [1]143.