Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 521 Hüküm no: 797 Orijinal metin no: [65a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Karabet v. Asvador’un borcunu ödemesi Ma‘rûz; Mahmiye-i İslâmbol hısnı ebvâbından Balatkapısı dâhilinde mütemekkin Enserci Menteş v. Osep ile diğer Menteş v. Abraham nâm Yahûdîler medîne-i Üsküdar’da mahfil-i bâbda meclis-i şer‘-i hatîrde neccâr tâifesinden Karabet v. Asvader nâm zimmî muvâcehesinde merkūm Karabet zimmî târih-i i‘lâmdan bir ay mukaddem yedimizden iştirâ ve kabz eylediği beher vakıyyesi birer guruşdan kırk beş vakıyye mismâr semeninden kırk beş guruş hakkımızın on dokuz guruşunu yedinden ahz ü istifâ ve yirmi altı guruşu zimmetinde bâkī kalmağla taleb ederiz deyü da‘vâ ve merkūm Karabet zimmî cevâbında müdde‘iyân-ı merkūmândan ol-mikdâr mismârı ancak beher vakıyyesi yüzer akçeden otuz yedi buçuk guruşa iştirâ edip ziyâde müdde‘âlarını ba‘de’l-inkâr kabzlarını mu‘terif oldukları on dokuz guruşdan mâ‘adâ ancak zimmetinde on sekiz buçuk guruş deyni olduğunu ikrâr etmeğin müdde‘iyân-ı merkūmân ber-vech-i muharrer ziyâde müdde‘âlarını beyâna kādirler olamayıp talebleriyle merkūm Karabet zimmî gıbbe’t-tahlîfi’ş-şer‘î mûcebiyle meblağ-ı bâkī-i merkūm on sekiz buçuk guruşun edâsıyla merkūm Karabet zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 17 min-Z sene 1205