Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 521 Hüküm no: 796 Orijinal metin no: [65a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hanım ile damadı Mehmed Ağa’nın aralarındaki husumeti bitirip sulh oldukları Ma‘rûz; Medîne-i Üsküdar’da Kefçe mahallesinde sâkine mu‘arrefetü’z-zât Emine bt. Osman nâm hatun medîne-i mezbûrede mahfil-i bâbda meclis-i şer‘-i hatîrde hâlâ dâmâdı el-Hâc Ahmed Ağa b. İbrahim nâm kimesne muvâcehesinde ben dâmâdım mezbûr el-Hâc Ahmed Ağa’nın menzilinde mâ‘an sâkine iken âhar menzile nakl esnâsında eşyâ-i memlûkemden iki havlu ve iki değirmi tülbent ve bir sahan ve iki keyl pirinç ve yedi [vakıyye] asel ve altı vakıyye bulama ve yarım keyl dakīkım dâmâdım mezbûrun menzilinde kalmağla taleb ederim deyü da‘vâ ol dahi cevâbında zikr olunan eşyâ menzilinde kaldığını inkârından mâ‘adâ müdde‘iye-i mezbûre Emine hatun her gün menzilim ve dükkânım önüne gelip beni tekdîr ve ta‘cîz ve mûcib-i ta‘zîr olur elfâz-ı kabîha ile bana şetm eder deyü da‘vâ ve beynlerinde ba‘de-vukû‘ı’l-münâza‘a bâ-tavassut-ı muslihîn mezbûr el-Hâc Ahmed Ağa zikr olunan eşyâyı bi-a‘yânihâ âhardan iştirâ ve müdde‘iye-i mezbûreye edâ ve teslîme ve müdde‘iye-i mezbûre Emine hatun dahi fî-mâ ba‘d dâmâdı mezbûr el-Hâc Ahmed Ağa’nın menzili ve dükkânı önüne varıp tekdîr etmemek üzere her biri ta‘ahhüd ve bu vechile beynleri ıslâh olunduğu bi’l-iltimâs huzûr-ı âlîlerine i‘lâm olundu. Fî 20 min-Z sene 1205